Քաջարանի գյուղապետը ՀՀ վարչապետին ոչինչ չի խոստացել: Այս մասին «Առաջին լրատվական»-ի հետ զրույցում տեղեկացրեց Քաջարանի գյուղապետ Ռաֆիկ Աթայանը: Նա նշեց, որ այս շրջանում ոչ մի կուսակցության կամ քաղաքական գործչի խոստումներ չի տվել, թե ինքը կամ գյուղացիները կքվեարկեն որևէ կուսակցության օգտին:
ՀՀ կառավարության 2011 թվականի ապրիլի 28-ի N 627-Ն որոշման համաձայն` ՀՀ Սյունիքի մարզի Քաջարանի, Արծվանիկի, Սևաքարի, Աճանանի, Չափնիի և Սյունիքի համայնքների վարչական սահմաններում որոշ տարածքներ ճանաչվել են բացառիկ գերակա հանրային շահ, և հողերի նպատակային նշանակությունը փոփոխվելու է: Որոշումը կայացվել է` հաշվի առնելով Սյունիքի մարզի Քաջարանի պղնձամոլիբդենային հանքավայրի շահագործման ծրագիրը: Այսինքն` տվյալ հողերը պետք է օգտագործվեն հանքավայրի ընդլայնման նպատակով: Արդեն մի քանի ամիս է որոշման վերաբերյալ իրենց անհամաձայնությունն են հայտնում Քաջարան գյուղի բնակիչները, մասնավորապես գյուղապետը: Վերջերս նաև գյուղապետը նամակով դիմել է ՀՀ նախագահ Սերժ Սարգսյանին:
Նշենք, որ մարտի 3-ին Քաջարան քաղաքում տեղի էր ունեցել վարչապետի և Քաջարանի գյուղացիների հանդիպումը: Գյուղապետ Ռաֆիկ Աթայանը կառավարության N 627-Ն որոշումը վերացնելու պահանջով հարցադրում էր ուղղել վարչապետին, ով պատասխանել էր, որ այդ հարցին պետք է տալ արդարացի լուծում: «Մենք կկայացնենք մեր պետության, մեր հասարակության շահերից բխող որոշում: Առաջին հերթին` մարզի բնակչության շահերից բխող որոշում»,- ասել էր վարչապետը:
