«Գալիք ընտրություններին ժողովրդավարությունը կհանվի աճուրդի»,- այսօր լրագրողների հետ հանդիպմանը ասաց «Նոր ժամանակներ» կուսակցության ղեկավար Արամ Կարապետյանը:
Նա հայտնեց, որ իր ղեկավարած կուսակցությունը չի մասնակցելու ընտրություններին, և այդ որոշումը քաղաքական է: Ըստ նրա` այլ խնդիրներ` ֆինանսական, մարդկային, տնտեսական, չկան:
«Չենք մասնակցելու, քանի որ, մեր կարծիքով, ընտրությունների արդյունքները նախապես պարզ են, այսինքն` ընտրություններն ազատ չեն լինի և չեն արտահայտի հասարակության կամքը: Դրանք կանցնեն այնպես, ինչպես միշտ են անցել՝ վկան Հրազդանի ընտրությունները, որը ցույց տվեց, որ իշխանությունը նպատակ ունի ձևավորել այնպիսի խորհրդարան, որտեղ կունենա լուրջ մեծամասնություն, որտեղ ընդդիմության քանակ կապահովվի միայն ժողովրդավարություն ցույց տալու համար»,- մեկնաբանեց բանախոսը։
ՆԺԿ ղեկավարի կարծիքով՝ ընդդիմությունն ունի երկու ճանապարհ. կամ պետք է մասնակցի ընտրություններին՝ այդ կերպ լեգիտիմացնելով դրանք, կամ չպետք է մասնակցի։
Նրա համոզմամբ` այս ընտրությունները լինելու են փողի ընտրություն, և մեզ մնում է տեսնել, թե որքանով հասարակությունը կլինի ակտիվ: Ըստ նրա` եթե հասարակությունը իր իրավունքները պաշտպանելու համար ակտիվություն դրսևորի, ապա դուրս կգա փողոց:
«Նոր ժամանակներ»-ը կարծում է, որ արմատական ընդդիմության պայքարի միակ ճանապարհը փողոց դուրս գալն է՝ Հայաստանում այլ ճանապարհ չկա:
Անդրադառնալով խորհրդարանական ընտրություններին ՀԱԿ-ի մասնակցության հարցին` Ա. Կարապետյանը ենթադրեց, որ այդկերպ ՀԱԿ-ը հնարավորություն կունենա ժողովրդին ակտիվացնելու: Արամ Կարապետյանի տեղեկություններով` ՀԱԿ-ը պետք է պայքարի, որպեսզի իշխանությունը մեծամասնություն չունենա խորհրդարանում:
«ՀԱԿ-ը ընտրություններին գնում է երկու կարգախոսով` մեծամասնություն կամ իմպիչմենտ, այսինքն` եթե ոչ մեծամասնություն, ապա պարտություն»,- նկատեց Արամ Կարապետյանը։
ՆԺԿ ղեկավարը չի ողջունում ընդդիմադիր կուսակցությունների՝ այս ներկայացմանը մասնակցելու որոշումը, իսկ ՀՀԿ-ին անդամագրված մարդկանց համարեց ծախված:
