Հայտնի է, որ հունվարի 18-21-ը Հայաստան կատարելիք այցի ընթացքում Եվրոպայի խորհրդի Մարդու իրավունքների գլխավոր հանձնակատար Թոմաս Համարբերգը, ի թիվս այլ հանդիպումների, հանդիպելու է նաև հասարակական կազմակերպությունների ներկայացուցիչների հետ:
«Համագործակցություն հանուն ժողովրդավարության» հասարակական կազմակերպության նախագահ Ստեփան Դանիելյանը «Առաջին լրատվականի» հետ զրույցում նշեց, որ պարոն Համարբերգի հետ կայանալիք հանդիպման ժամանակ ինքը բարձրաձայնելու է հիմնականում ոստիկանությունում տեղի ունեցող խոշտանգումների մասին: «Ոստիկանությունում մարդկանց խոշտանգում են, ունենք նույնիսկ մահվան դեպքեր, սակայն դրանից հետո էլ ոչ ոք չի պատժվում: Հասարակության մեջ գնալով նվազում է վստահությունը ոստիկանության նկատմամբ, քանի որ ահաբեկման մթնոլորտ է տիրում»:
Ստեփան Դանիելյանին մտահոգում են նաև իշխանությունների կողմից հասարակության մեջ կրոնական թշնամանք սերմանելու փորձերը: Մեզ հետ զրույցի ժամանակ նա տեղեկացրեց, որ պատրաստվում է բարձրաձայնել նաև այս խնդրի մասին: Պարոն Դանիելյանը ուշադրություն է հրավիրում այն փաստի վրա, որ մամուլով և հեռուստատեսությամբ հասարակության մի հատվածի` տարբեր կրոնական կազմակերպությունների նկատմամբ սերմանվում է կրոնական թշնամանք:
«Առաջին լրատվականը» հետաքրքրվեց, թե Ստեփան Դանիելյանը չի՞ պատրաստվում արդյոք Թոմաս Համարբերգին իրազեկել նաև բանակում տեղի ունեցող սպանությունների մասին, որոնք այդպես էլ չեն բացահայտվում: «Բանակում տեղի ունեցող սպանությունները շատ ցավոտ են: Պետք է այդ հարցերի մասին բարձրաձայնել: Մյուս կողմից` ՀՀ քաղաքացիների անվտանգության երաշխավորը բանակն է, և միջազգային կառույցների առջև բանակում տեղի ունեցող դեպքերի մասին բարձրաձայնելը բարդ իրավիճակի առջև է կանգնեցնում: Պետք է հաշվի առնել, որ մենք խնդիրներ ունենք նաև հարևան երկրների հետ: Այս առումով ես դեռ կողմնորոշված չեմ և չգիտեմ` պե՞տք է բանակում տեղի ունեցող սպանությունների մասին բարձրաձայնել, թե՞ ոչ»,- մեր զրույցի ժամանակ ասաց Ստեփան Դանիելյանը:
