Մի խումբ լեզվաբաններ Իտալիայից, ԱՄՆ-ից և Իսրայելից անցկացրել են եբրայերեն, անգլերեն և իսպաներեն լեզուների տեքստերի վիճակագրական վերլուծություն և եկել այն եզրակացության, որ նոր բառերի ամրագրման արագությունը վերջին ժամանակներում զգալիորեն հետ է մնում հին բառերի կորստի արագությունից, ինչի արդյունքում տեղի է ունենում բառապաշարի բազմազանության կրճատում: Հոդվածը հրապարակվել է Scientific Reports ամսագրում:
Հետազոտողներն օգտագործել են տեքստեր, որ թվայնացրել է Google Inc ընկերությունը` գրքերի սկանավորման նախագծի շրջանակներում:
Ընկերության հավաքածուի չափը ներկայումս գնահատվում է մոտավորապես 4 տոկոս` մարդկության կողմից հրատարակված գրքերի ամբողջ քանակից:
Հեղինակների կողմից վերլուծվել է մոտ 10 մլն բառի օգտագործում 1800-2008 թթ. ընթացքում:
Հիմնական եզրակացությունը, որ արվել է բառերի օգտագործման վերլուծության հիման վրա, տեղեկացնում է, որ, չնայած նոր ֆենոմենների աճող հոսքին, նոր բառերի հայտնվելը վերջին 10-20 տարիների ընթացքում զիջում է հների անհետացմանը և, ընդհանուր առմամբ, լեզուն բառապաշարի տեսանկյունից ավելի աղքատ է դառնում:
Լեզվաբանները մասնակիորեն բացատրում են այդ երևույթը էլեկտրոնային նամակագրության ժամանակ ավելի նեղ բառապաշար օգտագործելու միտումով:
Այնուամենայնիվ, նոր բառերը, որոնց առաջացումը լեզվաբաններն ամրագրել են թվայնացման դարաշրջանում, նախկինի համեմատ ավելի արագ տարածվելու հատկություն ունեն:
Հետազոտողները գնահատել են այն ժամանակը, որ անհրաժեշտ է նոր բառին լայն ճանաչողության համար՝ մոտ 40 տարի: Եթե այդ ընթացքում լայն տարածում տեղի չի ունենում, բառը ամենայն հավանականությամբ անհետանում է:
