Նյույորքցի 40-ամյա կատակերգու դերասան Ջեֆ Ռեգսդեյլը, որը անցած հոկտեմբերին քաղաքում հայտարարություն էր տեղադրել այն մասին, որ ինքը միայնակ է, ստացել է ավելի քան 65 հազար հեռախոսազանգ: Մեկ օրում նա խոսել է ավելի քան 16 ժամ: Այս մասին գրում է The New York Post-ը:
Իր ընկերուհու հետ բաժանումը ծանր տանող տղամարդը որոշել է գտնել մարդկանց հետ ծանոթանալու նոր եղանակ: Կատակերգուի խոսքով`այնպիսի մեգապոլիսում, ինչպիսին Նյու Յորքն է, որտեղ յուրաքանչյուրն անվերջ ինչ-որ տեղ է շտապում, դժվար է ինչ-որ մեկին հանդիպել: Այդ իսկ պատճառով է որոշել դիմել հայտարարության օգնությանը: «Եթե ինչ-որ մեկը ցանկանում է ինչ-որ բանի մասին խոսել, զանգահարեք միայնակ Ջեֆին»,- գրված է եղել թերթիկին:
Տղամարդն ի սկզբանե մտածել է, որ իրենց կզանգի մի 10 մարդ, ինչը հաղթանակ կլինի, սակայն հենց առաջին օրը նա ստացել է 100 հեռախոսազանգ և հաղորդագրություն, ապա զանգեր են հնչել Իսպանիայից, Իրաքից, Թայվանից, Ավստրալիայից, անգամ Սաուդյան Արաբիայից: Ինչպես նշում է ITAR-TASS-ը, ամենից շատ զանգեր նա ստացել է Կանադայից:
«Հավանաբար, դա շատ միայնակ երկիր է»,- կատակում է կատակերգուն:
