Աֆղանստանում 16 մարդու գնդակահարած ամերիկացի զինվոր Ռոբերտ Բեյլսի փաստաբանն ասել է, որ իր պաշտպանը տառապում է ամնեզիայով և չի հիշում հանցագործության պահը. այս մասին հաղորդում է Associated Press գործակալությունը:
Հայտնի է, որ Բեյլսը երեկ հանդիպել է իր փաստաբանների հետ. հանդիպումը տևել է ավելի քան 7 ժամ: Դրանից հետո փաստաբանն ասել է, որ իր պաշտպանյալը «հիշում է միայն այդ երեկոյի սկիզբն ու վերջը, սակայն չի կարողանում հիշել հանցագործության բուն պահը»:
Փաստաբանը հավելել է, որ հանցագործության պահին իր պաշտպանյալը չի եղել հարբած վիճակում` նա ընդամենը մի քանի կում է արել: Ըստ փաստաբանների` Բեյլսն անհանգստանում է իր ընտանիքի և ընկերների անվտանգության համար, որոնք կարող են վրեժի զոհ դառնալ:
Հիշեցնենք, որ մարտի 11-ին ամերիկացի զինվորը ներխուժել է Կանդահար նահանգում ամերիկյան ռազմաբազայի հարևանությամբ գտնվող մի գյուղ և գնդակահարել 16 խաղաղ բնակչի, այդ թվում` կանանց և երեխաների:
