Այսօր լրագրողների հետ հանդիպմանը Սամցխե-Ջավախք հայկական հասարակական կազմակերպությունների խորհրդի համակարգող Արտակ Գաբրիելյանը անդրադարձավ Ջավախքում առկա խնդիրներին՝ նշելով, որ իրենց խորհրդի կողմից մշակվել է հուշագիր, որը ներկայացվել է Եվրախորհրդի պատգամավորներին։
«Հանդիպումը ԵԽ պատգամավորների հետ կազմակերպել էր Բրյուսելի Հայ դատի գրասենյակը: Պատրաստված հուշագրում ներկայացված էին Ջավախքին վերաբերող մի քանի սկզբունքային հարցեր: Դրանց թվում են՝ Վրաստանի կազմում Ջավախքը որպես ինքնավար սուբյեկտ հանդես գալու, հայերենին տարածաշրջանային լեզվի կարգավիճակ տալու, ինչպես նաև մի շարք սոցիալ-տնտեսական խնդիրներ»:
Արտակ Գաբրիելյանի խոսքով՝ հանդիպումներն անցել են բարձր մակարդակով, և այն պատգամավորները, ովքեր եղել էին տարածաշրջանում և տեղյակ էին որոշ հարցերի մանրամասներին, կարծում էին, որ Վրաստանում ազգային փոքրամասնությունների՝ մասնավորապես հայերի նկատմամբ տարվում է խտրական վերաբերմունք:
«Պատգամավորները հիմնականում հետաքրքրվում էին այն դեպքերով, որոնք առնչվում էին մարդու իրավունքների խախտումներին: Նրանց համար նույնիսկ անհասկանալի էր, թե այսքան ժամանակ ինչու այդ հարցերը միջազգային ատյաններում չեն բարձրաձայնվել»,- նշեց Արտակ Գաբրիելյանը:
Որպես արդյունք, վերջինիս հավաստմամբ, պատգամավորները խոստացել են աջակցել մի շարք հարցերում։ Օրինակ՝ որպեսզի Վրաստանին հատկացվող գումարներն ուղղվեն նաև Ջավախք, կաջակցեն նաև լեզվի կարգավիճակի հետ կապված հարցերում։
«Վրաստանը, որպես Եվրոպային, ինչու չէ՝ նաև ԱՄՆ-ին բարեկամ երկիր, ստանում է մեծ քանակությամբ գումարներ, որոնք ծախսվում են հիմնականում Թբիլիսիի և այլ վրացական քաղաքների զարգացման համար, սակայն մինչ օրս որևէ գումար չի հատկացվել Ջավախքին»:
Վերջինս ցավով անդրադարձավ հատկապես այն հարցին, որ բազմիցս խոսվում է երկու երկրների եղբայրության, դարավոր բարեկամության մասին, որի առանցքը, ըստ էության, պետք է լինի Ջավախքը, սակայն երկկողմ հանդիպումների ժամանակ մեր պատգամավորների կողմից ընդհանրապես չի շոշափվում Ջավախքի խնդիրը:
Որպես ամփոփում՝ բանախոսը հավաստիացրեց, որ Ջավախքի խնդրի հիմնական և միակ լուծումը ինքնավարությունն է. այդ դեպքում մեխանիկորեն կլուծվեն մյուս բոլոր խնդիրները:
