Բնապահպանների պայքարը Երևանի «Նեմո» դելֆինարիումի դեմ շարունակվելու է: Այսօր «Առաջին լրատվական»-ի հետ զրույցում տեղեկացրեց «Թռչնասերների կենտրոն» ՀԿ նախագահ Սիլվա Ադամյանը` խոսելով Երևանի «Նեմո» դելֆինարիումի շուրջ ծավալված պայքարի մասին:
Նա նշեց, որ անկախ դատարանի վճռից, բնապահպանները պայքարելու են մինչև վերջ` մինչև դելֆինարիումի փակում: Նրա պնդմամբ` Երևանի դելֆինարիումը չի համապատասխանում ժամանցի նման վայրեր կառուցելու միջազգային շինարարական ստանդարտներին:
Հիշեցնենք, որ Երևանի վարչական դատարանը քննում է «Թռչնասերների կենտրոն» և «Էկոդար» ՀԿ-ների հայցն ընդդեմ Բնապահպանության նախարարության: Հերթական դատական նիստը տեղի կունենա մարտի 24-ին՝ ժամը 15.00-ին: Հաջորդ դատական նիստին հայցվորն ու պատասխանողը կլսեն փորձագետի կարծիքը դելֆինարիումի վերաբերյալ, որն, ըստ Սիլվա Ադամյանի, շատ կարևոր է դատարանի ճիշտ վճռի համար:
