«Առաջին լրատվական»-ի զրուցակիցն է Կոտայքի մարզպետ Կովալենկո Շահգալդյանը:
– Պարոն Շահգալդյան, Կոտայքի մարզը ընդունված է համարել ամենաինտրիգային մարզը` հաշվի առնելով այն հանգամանքը, որ Աբովյանը ԲՀԿ-ինն է: Վերջերս Վլադիմիր Գասպարյանն իր հարցազրույցներից մեկում նշեց, որ ուզում է Աբովյանը միացնել Հայաստանին, տողատակերում պարզ էր, որ Աբովյանը պետք է հանրապետականացնել: Ի՞նչ պրոցեսներ են և ինչպե՞ս եք պատկերացնում այդ միացումը:
– Կարծում եմ, դա ասված է հումորով: Գիտեք, մեր ժողովուրդը շատ է քաղաքականացվել: Այս գործընթացների լույսի ներքո շատ պարզ երևում է, որ ձեր ասած ինտրիգները առկա են, ամեն մեկը, իրեն հասանելի է, թե հասանելի չէ, փորձում է ինչ-որ բաներ անել: Սովորական քաղաքական գործընթացներ են: Աբովյանում որպես հանրապետական կուսակցություն՝ ունենք մեր համակիրները, կուսակիցները, որոնց աշխատանքի արդյունքում կունենանք մեզ համապատասխան ձայներ:
– Վերջին շրջանում Արթուր Հարությունյանը` Պալաչը, սանիկին՝ Գագիկ Ծառուկյանին մարտահրավեր է նետել, հնարավո՞ր է, որ սա պայմանավորված է հանրապետականի` Աբովյան քաղաքում ձայներն ընդլայնելու հետ:
– Բացարձակապես ոչ: Նախ ես շատ վատ ընդունեցի այդ հարցազրույցը, որովհետև կուսակցական աշխատանքը չի կարելի տանել անձնական հարթություն: Որևէ մեկին վիրավորանք հասցնելու ձգտումը, ցանկությունը սխալ եմ համարում:
– Այսինքն` ճի՞շտ էր նրան նկատողություն անելը:
– Բնականաբար, ինքն իր սահմաններից դուրս էր եկել, մեր կուսակցության գործադիր մարմինը համապատասխան վերաբերմունք արտահայտեց:
– Այնուամենայնիվ, ընտրական գործընթացներին ընդառաջ՝ որևէ ինտրիգ, լարում չե՞ք տեսնում ԲՀԿ-ի և ՀՀԿ-ի միջև:
– Պատահական չասացի, որ մեր ժողովուրդը քաղաքականացված է: Ինչքան վերևից ներքև է իջնում, այնքան այդ պայքարը թեժացնում են, ամեն մեկն ուզում է Հռոմի պապից կաթոլիկ երևալ, ուզում է ցույց տալ իր նվիրվածության աստիճանը: Ես իհարկե չեմ բացառում՝ այդ հակամարտությունը և ինտրիգները մանավանդ ընտրական գործընթացների ժամանակահատվածում, անխուսափելի են: Ամեն մի կուսակցություն իր որակով և իր վարկանիշի համեմատ է ընտրարշավ անում: Մի կուսակցությունն ինտրիգների վարպետ է, մի կուսակցություն դրա հնարավորությունը չունի, այլ ճանապարհ է ընտրել:
– Հանրապետական կուսակցությունն ի՞նչ ճանապարհ է ընտրել և ի՞նչ եք անում Դուք այդ ուղղությամբ:
– Հանրապետական կուսակցությունն ընտրել է քաղաքակիրթ եղանակով ընտրարշավ անելու ճանապարհը, և մենք անելու ենք ամեն ինչ, որ մեր երկրում և՛ ընտրարշավի ընթացքում, և՛ ընտրությունների բուն պրոցեսը, և՛ քվեարկության օրը որևէ խնդիր չառաջանա, որևէ լարվածություն չառաջանա, և ամեն ինչ արվի ընտրական օրենսգրքի շրջանակներում:
– Նկատի ունեք՝ մանկավարժները, մանկապարտեզները չե՞ն հանրապետականանա և այդ գործընթացից զե՞րծ կմնան:
– Կարծում եմ՝ պետք է ծանոթ լինեք, որ այդպիսի գործընթացներ մեր մարզում չեն ծավալվում: Իհարկե մենք ունենք համապատասխան թվով կուսակիցներ ե՛ւ մանկավարժների, ե՛ւ գործազուրկների մեջ, բայց մասսայական հանրապետականացնել կամ այլ կուսակցության շարքերը մտցնել, ես դրան դեմ եմ, որովհետև ամեն մեկն իր կամարտահայտությամբ պետք է դառնա կուսակցական, պարտադրանքով, զոռով կուսակցական դարձածից ի՞նչ ակնկալիքներ պետք է ունենաս…
– Պարոն Շահգալդյան, Ռոբերտ Քոչարյանի ժամանակ աշխատում էիք նրա հետ, հիմա աշխատում եք Սերժ Սարգսյանի հետ, արդյոք երկընտրանքի առաջ չե՞ք կանգնել, և արդյոք երկու քարի արանքում չե՞ք հայտնվել, նկատի ունեմ՝ ՀՀԿ-ի և ԲՀԿ-ի միջև:
– Կարծում եմ՝ Ռոբերտ Քոչարյանի քաղաքականությունից սկսած մեր երկրում քաղաքական կուրսը չի փոխվել, և այսօրվա նախագահը շարունակում է մեր երկրում ձևավորված քաղաքական կուրսը: Ես աշխատում եմ գործադիր մարմնում և կատարում եմ իմ պարտականությունը, աշխատում եմ պարտականություններս կատարել ամբողջ ծավալով և կարծում եմ՝ դա է պատճառը, որ ես այսքան երկար ժամանակ մարզպետի պաշտնում պաշտոնավարել եմ:
– Իսկ Ռոբերտ Քոչարյանի հետ հարաբերություններն ինչպե՞ս են, արդյոք չե՞ն սրվել:
– Բայց ինչո՞ւ պետք է սրվեին…Ես չեմ կարծում, որ որևէ հակամարտություն կա ՀՀԿ-ի և ԲՀԿ-ի միջև: Մրցակցությունը հակամարտություն չէ, սա ընդամենը գործընկերային մրցակցություն է, որովհետև ԲՀԿ-ն կոալիցիոն մեր գործընկերն է:
– Սոցիոլոգները տարբեր հարցումների արդյունքում պարզել են, որ խորհրդարանում կգերակշռեն ԲՀԿ-ն , ՀՀԿ-ն և ՀԱԿ-ը: Ի՞նչ կարծիք ունեք Դուք:
– Իհարկե չունեմ սոցիոլոգի մասնագիտություն, բայց վերլուծություններ արվում են և ձեզ հետ համաձայն եմ, որ իհարկե խորհրդարանում անպայման կհայտնվենն ՀՀԿ-ն, ԲՀԿ-ն և ՀԱԿ-ը, Դաշնակցությունը և Օրինաց երկիրը ևս տեղ կունենան խորհրդարանում:
– Սրանք Ձեր մարզի վերլուծությունների արդյունքնե՞րն են, այս տրամադրությոնը այստե՞ղ է առկա:
– Կարծում եմ Հայաստանում սոցիոլոգիական հարցումները չեն կարող անաչառ լինել և իրական պատկերը արտահայտել, քանի որ հայերս մի բան ասում ենք, բայց այլ բան ենք մտածում կամ անում: Մեծ մասամբ հավաստի չեմ համարում սոցիոլոգիական հարցումնեհո» դրանք ենթադրությունների բնագավառից են և ենթադրություններով չես կարող կանխորոշել ընտրությունների ելքը:
– Ձեր մարզում Ձեր դիտարկմամբ ՀՀԿ-ն, ԲՀԿ-ն և ՀԱԿ-ը կգերակշռե՞ն:
– Մենք պայքարում ենք, ամեն մի կուսակցություն, ընտրապայքարի մեջ մտնելով, ունենում է ընդամենը մեկ նպատակ՝ պայքարում հաղթել, այլապես անիմաստ կլինի պայքարել: Հիմա մենք նույնպես պայքարում ենք հաղթելու համար:
– Պարոն Շահգալդյան, վերջին մեկուկես տարին մարզում ակտիվորեն քննարկվում է երկաթի հանքի շահագործման թեման, ի՞նչ մոտեցում ունեք Դուք: Մենք տեսնում ենք, որ բնապահպանական շարժումները շատացել են, մասնավորապես Մաշտոցի պուրակի համար են պայքարում, մտավախություն չունե՞ք, որ հանքի շահագործման դեպքում մարզում մեծ պայքար կլինի:
– Բոլոր դեպքերում այդ պայքարը ես համարում եմ փոթորիկ մեկ բաժակ ջրում: Իհարկե էապես պետք է պայքարենք մեր բնությունը պահպանելու համար: Դա կենսական անհրաժեշտություն է, բայց պահեր կան, որ այդ պայքարը ոչ թե անհրաժեշտություն է, այլ շահարկելու առիթ: Հրազդանի հանքի շահագործման վերաբերյալ կարող եմ ասել, որ կողմ եմ, որ հանքը շահագործվի, որովհետև դրանով մեր բյուջեն կունենա լրացուցիչ եկամուտներ, կունենանք աշխատատեղեր, բնակչությունը աշխատանքով կապահովվի: Մենք չինական կազմակեպության առաջ մի խնդիր ենք դրել. հանքը պետք է շահագործվի առանց մեր բնությանը և ժողովրի առողջությանը վնաս տալու:
– Որևէ փաստաթուղթ այդ ուղղությամբ ներկայացրե՞լ են արդյոք:
– Հանքի շահագործման նախագիծ դեռ որ չկա: Շահագործման նախագիծը պետք է հաստատվի համայնքի ղեկավարի կողմից, բնականաբար մինչև այդ նախագծի հաստատումը այն կդրվի լայն քննարկման փորձագետների, ավագանու կողմից, և կկարողանանք պարզել՝ արդյոք այդ նախագիծը հնարավորություն տալիս է հանքը շահագործել առանց մարդկանց առողջությանը և բնությանը վնաս տալու:
– Պարոն Շահգալդյան, նախորդ ընտրություններում հաղթել է ձեր նախընտրած կուսակցությունը, ի՞նչ խոստումներ էին հնչել այդ ժամանակ և որքանո՞վ հնարավոր եղավ այդ խոստումները ի կատար ածել:
– Մենք շատ քաղաքակիրթ եղանակով ենք պայքարն իրականացրել: Մեր քաոզիչները այցելում էին բնակարաններ, լսում մարդկանց կարծիքները և առաջարկություններ ենք ստացել և իհարկե այդ առաջարկությունների մեծ մասը իհարկե ողջամիտ էին, ծրագիր դարձնելը և իրականցնելը պարտադիր էր: Հիմա քաղաքապետարանի աշխատակազմը աշխատում է այդ առաջարկությունների վրա, որպեսզի մտցնի Հրազդան քաղաքի չորս տարվա զարգացման ծրագրի մեջ:
– Ի՞նչ խոստումներն են տրվել մարզին չորս տարի առաջ և որո՞նք են կատարվել:
– Նախագահի նախընտական խոստումները, որը ամրագրվեց երկրի ղեկավարի հրամանագրով, բոլոր խոստումներն իրականցվել են 100 տոկոսով:
– Այդ դեպքում ինչո՞ւ մարզի կյանքը չի փոխվել:
– Եթե կարծում եք, երկրի բոլոր հարցերը 10-20 տարվա մեջ պետք է լուծվեին, ուրեմն իրատես չեք, իսկ իրատեսականն այն է, որ մենք դեռևս պատերազմող երկիր ենք, և պետք է իմանաք, որ մեր աշխարհագրական դիրքը հնարավորություն չի տալիս շփվել, ունենալ համապատասխան ճանապարհ, բաց ծով դուրս գալ և այլն, այս ամենը լուրջ խոչընդոտներ են: Իհարկե մարզում դեռևս այնքան չլուծված խնդիրներ կան, որ պատկերացնել չի էլ կարելի: Եվ ինչո՞ւ է այդպես, որովհետև գնալով բնակչության պահանջները պետք է մեծանան, և մեր կառավարության հնարավորությունները զուգահեռ չի ստացվում, որովհետև մենք ֆինանսական միջոցներ չունենք: Բնական եմ համարում, որ ժողովուրդը պահանջում է: Մեր մարզում շատ խնդիրներ լուծվել են և դեռ լուծվելու փուլում են, և շատ խնդիրներ դեռ պետք է լուծվեն, պետք է լավատեսորեն ապրենք, կյանքին նայենք ուղիղ, ամեն մեկս մեր պետությանը, մեր երկրին նախ պետք է տանք, հետո նոր պահանջենք:
– Ի՞նչ տանք, որ պահանջենք, ի՞նչ ի նկատի ունեք:
– Սիրենք, հարգենք, այս երկրի օրենքները, պահենք, պահպանենք, արհամարհական վերաբերմունք չունենանք, անտարբերություն չցուցաբերենք:
– Փոխվե՞լ է հասարակությունը:
– Որոշ առումով փոխվել է, բայց ցանկալի կլինի, որ ժողովրդի հոգեբանությունը փոխվեր: Շատ շատերը դեռևս սովետական դատարկ ուսապարկը քարշ են տալիս, որի մեջ ոչինչ չկա, և պատահական չէ մեր կարգախոսը՝ հավատանք, որ փոխենք: Ես արդեն տարիներ շարունակ իմ հանդիպումների ժամանակ շատ պարզ և բոլորին հասկանալի լեզվով ասում եմ՝ փոխվեք հոգեբանությամբ, որովհետև եթե ձեր հոգեբանությունը, մտածելակերպը մնա սովետական, մենք չենք կարող ոչնչի հասնել, իսկ այսօր մեր երկրում ապրողների ճնշող մեծամասնության մտածելակերպը դեռևս խորհրդային է:
– Հնարավո՞ր է, որ Պալաչը Աբովյան քաղաքում այդ ստրուկի հոգեբանությունը վերացրեց:
– Այդ թեման ավելի շատ շահարկման մեջ դրվեց, քան դրա մեջ ինչ-որ բան կար:
– Ի՞նչ հարաբերությունների մեջ եք Գագիկ Ծառուկյանի հետ, մանավանդ ձեր մարզում շատ բան է անում:
– Ծառուկյանի հետ նորմալ հարաբերությունների մեջ եմ, ամեն մեկս մեր աշխատանքն ենք կատարում: Ես իմ ծառայողական պարտականություններն եմ կատարում, ինքն էլ իր պատգամավորական և գործարարի պարտականությունն է կատարում, որևէ կիսելու բան չունեմ և որևէ ընդհարում չունեմ: Եթե կիսելու բան չունենք, ուրեմն ընդհարում էլ չի կարող լինել:
– Ասում են՝ Աբովյանը այս տարիներին ամբողջությամբ ԲՀԿ-ին է պատկանել, և սա որևէ մեկի համար գաղտնիք չէ:
– Չգիտեմ այդ դարձվածքը որտեղից եք գտել կամ մուտք արել: Աբովյան համայնքը Կոտայքի մարզի համայքներից մեկն է: Մեր երկրում կուսակցություններին համայնքային պատկանելիություն չկա:
– Ընտրությունների նախապատաստական աշխատանքերը սկսվել են: Ի՞նչ տարբերություն կա նախորդի նախապատրաստական աշխատանքների հետ համեմատ:
– Տարեցտարի մարդիկ ավելի խելացի, ավելի փորձված են դառնում, անցածի սխալներն ի նկատի ունենալով, որոշ նոր տեխնոլոգիաներ ենք ընտրում ավելի թափանցիկ և անպայման արդար անցկացնելու համար:
Ի՞նչ եք կարծում, եթե վերջերս կայացած քաղաքապետի ընտրությունները արդար և թափանցիկ չլինեին, Կոնգրեսը չէ՞ր շահարկի: Այդ դեպքում ինչո՞ւ չբողոքարկեցին, որովետև կանխավ ընդդիմությունը պատրաստվել էր ստեղծել անպիսի իրավիճակ, որ ընտրությունները բողոքարկեր և այլն, բայց իրենց չհաջողվեց, որովհետև մենք կողմ ենք, որ ընտրությունները պետք է լինեն արդար և թափանցիկ:Եվ այս անգամ մեր մարզում ևս կարող եմ երաշխիքներ տալ, ընտրությունները անցնելու են արդար, առանց կեղծիքների:
