Պուշկինի անվան թատրոնի գեղարվեստական ղեկավար Եվգենի Պիսարևը փորձում է Մարկ Տվենի անհայտ պիեսի հիման վրա բեմադրել «Տաղանդներ և մահացածներ» ներկայացումը, որի գլխավոր դերում հանդես է գալու երգիչ Սերգեյ Լազարևը:
«Բոլորը փնտրում են նոր պիեսներ, սակայն կան որոշ դասականների գործեր, որոնք մոռացվել կամ անհետացել են: Մարկ Տվենի ստեղծագործությունն ուսումնասիրողներից մեկը Ամերիկայի գրադարաններից մեկում գտել է նրա չավարտված կատակերգության ձեռագիրը, որում գրողը վերափոխել է իր հայտնի` «Կենդանի է, թե մեռած» ստեղծագործությունը:
Պատմվածքը հայտնի է, սակայն ոչ ոք չգիտեր, որ նման պիես գոյություն ունի»,- RIA Novosti-ին պատմել է Պիսարևը:
Նրա խոսքով` պիեսը թարգմանվել է ռուսերեն, և հենց Ռուսաստանում էլ կկայանա դրա պրեմիերան: Պիեսը հիմնված է իրական իրադարձությունների վրա:
Ռեժիսորի խոսքերով` այս դերով ինքը ցանկանում է Լազարևին և բոլորին ցույց տալ, թե ինչ տաղանդով է օժտված երգիչը: Նա նաև հավելել է, որ եթե չլիներ Լազարևը, այս պիեսը չէր բեմադրվի:
