Այսօր լրագրողների հետ հանդիպմանը Հայաստանի քարանձավագիտության կենտրոնի նախագահ Սամվել Շիրինյանը խոսելով Մոզրովի քարանձավի փլուզումից նշեց, որ քարանձավները չնայած իրենց փխրուն կառուցվածքին, բավականին ամուր են և առաջանում են կրաքարերի քայքայման հետևանքով. «Առաջին փլուզումը Մոզրովի քարանձավում եղել է 1974 թվականին, որից հետո բացվել է մուտքը դեպի քարանձավ։ Դրանից հետո այլ փլուզումներ չեն եղել, սակայն ճաքերն ու կախված քարերը բավականին շատ են։ Ժամանակին քարաթափ արվելու դեպքում վտանգներն ավելի քիչ կլինեին։ Սակայն կարծում եմ, որ դա երազանք է, քանի որ կապված է շատ մեծ գումարների հետ»։
«Փրկենք Մոզրովի քարանձավը» նախաձեռնության անդամ Գոռ Հովհաննիսյանի խոսքերով՝ իրենք ունեն բոլոր միջոցներն ու ֆինանսական ռեսուրսները, և դիմել են Մշակույթի նախարարություն վերանորոգումների իրավունք ստանալու համար, քանի որ Մշակույթի նախարարության կողմից ներկայացված «քարաթափը» իրականում փլուզում է և շատ վտանգավոր է քարանձավի համար. «Երկու ամիս առաջ ենք դիմել, զուտ թույլտվություն ստանալու համար։ Բայց իրենք ասեցին , որ երկու շաբաթից կկազմվի աշխատանքային խումբ, որը կազմվում է մինչև հիմա։ Իբր մասնագետներ են ուղարկել, բայց մեր գնալուց վաղուցվա ձյուն էր նստած, և ոչ մի մարդկային հետք այնտեղ չկար»։ Ապա ավելացրեց, որ դա մեծ տուրիստական պոտենցիալ է Հայաստանի համար, սակայն կամաց-կամաց մեռնում է ներթափանցած փոշու, ցրտի պատճառով. «Անցած ամառ մի քանի պրոֆեսիոնալ տուրիստներ էին եկել Հայաստան, ովքեր զբաղվում էին վայրի տուրիզմի զարգացման հնարավորություններն ուսումնասիրելով։ Եվ նրանք ուղղակի ապշած էին մեր քարանձավների գեղեցկությամբ և բարձիթողի վիճակով։ Այսքանից հետո դեռ Մշակույթի նախարարությունը հայտարարում է, որ մուտքն արգելվում է բոլորի համար՝ փոխանակ վերանորոգելու»։
Սամվել Շիրինյանի խոսքերով՝ քարանձավի միակ փրկությունը շահագործելն է, և երկրորդ տարբերակ գոյություն չունի. «Այն շատ մեծ նշանակություն ունի, ինչպես տուրիստական, այնպես էլ գիտական տեսանկյունից։ Պետք է, որ շահագործվի գրագետ պայմաններով։ Իսկ ինչ է արվում այսօր. որոշ մարդիկ գումարներ աշխատելու նպատակով վերցնում են երեխաներին և չիմանալով՝ ինչ է ստորգետնյա դատարկությունը, ինչպես պետք է պահել այնտեղ, այդ երեխաների հետ հանգիստ սրտով առանց վախենալու մտնում են այնտեղ։ Ինչն ուղղակի անթույլատրելի է»։
Այդ ընթացում ասուլիսին ներկա էր նաև պատմամշակութային արգելոց-թանգարանների և պատմական միջավայրի պահպանության ծառայության աշխատակիցը, ով ուղղակի կասկածի տակ դրեց Գոռ Հովհաննիսյանի՝քարանձավով մտահոգվելու գաղափարը՝ հավաստիացնելով, որ ՊՈԱԿ-ի ներկայացուցիչները իրականում այցելել են քարանձավ և կազմել եզրակացություն դրա վերաբերյալ։ Սակայն Գոռ Հովհաննիսյանն էլ շարունակում էր պնդել, որ իրենց այցելության ժամանակ պարզ երևում էր, որ որևէ մարդ չի եղել քարանձավում, և ինքն էլ կասկածում է, որ քարանձավը առհասարակ հետաքրքրում է Մշակույթի նախարարությանը։
Նկարը` Է. Մարուխյանի
