Մարտի 1 սպանությունների բացահայտման կոսմետիկ միջոցներից կուշտ ենք: Այսօր «Առաջին լրատվական»-ի հետ զրույցում նման տեսակետ հայտնեց 2008 թվականի մարտի 1-ին սպանված Տիգրան Խաչատրյանի մայրը՝ Ալլա Հովհաննիսյանը` անդրադառնալով ԵԽԽՎ Մոնիտորինգի հանձնաժողովի Փարիզում անցկացված նիստին, որի օրակարգում է եղել ինչպես Հայաստանի, այնպես էլ Ադրբեջանի հարցով համազեկուցողների կատարած փաստահավաք այցերի վերաբերյալ տեղեկատվության քննարկումը:
ԵԽԽՎ-ն գաղտնազերծել էր Հայաստանի հարցով համազեկուցող Ջոն Պրեսկոտի Երևան հունվարի 16-17-ը այցի վերաբերյալ տեղեկատվական փաստաթուղթը: Համազեկուցողները փոխանցել էին, որ նախագահ Սերժ Սարգսյանը հայտնել էր, թե բաց է իրենց առաջարկների քննարկման համար և խնդրել է Դավիթ Հարությունյանին մշակել հայեցակարգ՝ անցկացնելու հանրային լսումներ քրեական հետաքննության արդյունքների վերաբերյալ. «Միևնույն ժամանակ նա հայտնեց իր մտահոգությունը, որ այս խնդիրը քաղաքականացվել է և կարող է շահարկվել քաղաքական նպատակներով՝ հատկապես 2012 թ. մայիսի 6-ի խորհրդարանական ընտրությունների համատեքստում: Ուստի նա առաջարկեց, որ լսումների ժամանակն ընտրվի այնպես, որ նվազագույնի հասցվի հնարավորությունը՝ շահարկելու այն նախընտրական քարոզչական նպատակներով»:
ՀՀ նախագահի այս դիտարկմանը դեմ է Ալլա Հովհաննիսյանը: Խոսելով հանրային լսումներից` նա ասաց, որ եթե պետք է Վազգեն Մանուկյանի և Շուշան Պետրոսյանի մակարդակով հանրային լսումներ լինեն, ապա կատեգորիկ դեմ է: Ալլա Հովհաննիսյանը հանրային լսումները ուղղակի կոսմետիկ բան է համարում: «Մենք ասել ենք և կասենք, որ ցանկանում ենք, որ Փաստահավաք խմբի նման խումբ լինի, որտեղ իշխանության և ընդդիմության ներկայացուցիչները, մեր փաստաբանները հավաքվեն և աշխատեն այս ուղղությամբ, իսկ կոսմետիկ միջոցներից կուշտ ենք»,- մեկնաբանեց Ա. Հովհաննիսյանը`հավելելով, որ պետք է պարտադիր նոր փորձագիտական խումբ ստեղծվի:
Նա նաև տեղեկացրեց, որ ԵԽԽՎ հայաստանյան գրասենյակից ստացել են մարտի 1-ին սպանվածների հարազատների նամակի պատասխանը ԵԽԽՎ Մոնիտորինգի հանձնաժողովի նախագահի կողմից: «Պատասխանել էին, որ մեր գործին հետամուտ են լինելու, և Պրեսկոտն ու Ֆիշերն ավելի ընդարձակ մեզ կպատասխանեն»,- մանրամասնեց Ա. Հովհաննիսյանը:
