Ֆրանսիայի դատարանը մերժել է Մեն և Լուարա դեպարտամենտի բնակչի հայցն ընդդեմ Google France ընկերության: Ֆրանսիացին փոխհատուցում էր պահանջում, քանի որ նրա նկարը պատահաբար հայտնվել էր Strett View ծրագրում:
Ծրագրի շրջանակում իրականացվում է տարբեր քաղաքների և բնակավայրերի փողոցների նկարահանում, և համացանցում դրանք հրապարակվում են գրեթե առանց խմբագրության: Նկարներից մեկում ֆրանսիացին պատկերվել էր մի մեքենայի կողքը միզելիս:
Դատավարության ժամանակ պարտված հայցվորը պետք է վճարի պատասխանող կողմի կատարած դատական ծախսերը, որը կազմում է 1200 եվրո: Իր որոշումը դատարանը բացատրել է նրանով, որ նկարը հրապարակվել է Google Inc.-ի կողմից, մինչդեռ դատական հայցը ներկայացվել էր ամերիկյան ընկերության ֆրանսիական դուստր ձեռնարկությանը:
Ավելի վաղ Google-ը պատրաստակամություն էր հայտնել ջնջելու այդ նկարը, սակայն հրաժարվել էր վճարել 10 հազար եվրո փոխհատուցումը: Ֆրանսիացին մեղադրել էր Google-ին այն բանում, որ ողջ գյուղը հիմա ծիծաղում է իր վրա:
