Այսօր լրացավ ժամկետը, երբ արտաքին գովազդային վահանակները տնօրինող կազմակերպությունները պետք է տեղեկություններ ներկայացնեին Կենտրոնական ընտրական հանձնաժողովին: Մասնավորապես, նախընտրական քարոզչության ժամանակահատվածում արտաքին գովազդային վահանակներում քարոզչական պաստառներ տեղադրելու նպատակով արտաքին գովազդային վահանակները տնօրինող կազմակերպությունները կամ մարմինները 5 քառակուսի մետրը գերազանցող մակերեսով վահանակները կուսակցություններին, կուսակցությունների դաշինքներին տրամադրելու համար վահանակների քանակի, մակերեսների, դրանց գտնվելու վայրերի և վարձավճարների վերաբերյալ տեղեկատվությունը ներկայացնում են ԿԸՀ-ի կայքում` ի գիտություն կուսակցությունների, կուսակցությունների դաշինքների:
ԿԸՀ նախագահի մամլո քարտուղար Հերմինե Հարությունյանն «Առաջին լրատվական»-ին հայտնեց, որ ընկերությունները ներկայացրել են պահանջված տեղեկությունը, այժմ այն ամփոփվում է և շուտով կհրապարակվի:
«Նուշիկյան ասոցիացիա» ՍՊԸ–ի տեղեկատվության հարցերով խորհրդական Հայկ Մարկոսյանը մեզ հայտնեց, որ իրենք ներկայացրել են քարոզարշավի ժամանակ ազատ վահանակների ցանկը: «Գնի փոփոխություն չի նախատեսվում և առկա պայմանագրերի շրջանակում կաշխատենք: Եթե ընթացքում նոր ազատ վահանակներ առաջանան, նույն գնով կտրամադրենք, իսկ գինը կախված է չափից, և յուրաքանչյուր գովազդատուի հետ համաձայնություն ենք ձեռք բերում»,- ասաց Հ. Մարկոսյանը:
«Զեբրա» գովազդային գործակալության տնօրեն Թամարա Հակոբյանը մեզ հետ զրույցում նշեց, որ ԿԸՀ ներկայացված ցանկում տվյալներ են բերվել Երևանում, մարզերում և միջպետական ճանապարհներին առկա վահանակների մասին, իսկ գովազդի միավորի գինը քառակուսի մետրի համար 2.5-5 հզ. դրամի սահմաններում է (մեկ ամսվա համար):
