Die Welt գերմանական պարբերականը, հղում անելով թուրքական Anadolu լրատավական գործակալությանը, գրում է, որ վերջերս արաբական երկրների և Թուրքիայի հարաբերություններին նվիրված համաժողովի ժամանակ խոսել է արաբների և թուրքերի փոխհարաբերությունների մասին: Նա կոչ է արել մոռանալ 19-րդ և 20-րդ դարերում իրենց ունեցած անհամաձայնությունները, երբ արաբները ապստամբեցին Օսմանյան կայսրության դեմ, դրա փոխարեն հիշելով պատմական ընդհանրությունները, որոնք միավորում են արաբներին և թուրքերին:
Այդ միասնությունը, ըստ Էրդողանի, հիմնված է նախ և առաջ իսլամի, ինչպես նաև քրիստոնեական ագրեսորների դեմ համատեղ պայքարի վրա. «Թուրքերն ու արաբները այս հողերը պաշտպանել են խաչակրաց արշավանքների ժամանակ»,- ասել է նա: Նա խոսել է նաև հետագայի ընդհանուր պայքարի մասին` հիշելով «Էրզրումի բռնազավթումը»` հավանաբար նկատի ունենալով հայ-ռուսական զորքերի առաջխաղացումն այս շրջաններում Առաջին աշխարհամարտի ընթացքում` մոռանալով, որ Թուրքիան ինքն էր պատերազմ հրահրել այդ ուղղությամբ:
Նա կոչ է անում նոր կյանք տալ «1000-ամյա եղբայրությանը» և ստեղծել «քաղաքական, տնտեսական ու մշակութային միություն»: «Մենք պատկանում ենք մեկ քաղաքակրթության: Մեր պատմությունը միասնական է»,- նշել է Էրդողանը:
Նա անընդհատ շեշտել է արաբա-թուրքական համերաշխության` որպես մուսուլմանական քաղաքակրթության առանցքի մասին: Այս համերաշխության շնորհիվ նա կարծում է, որ կարելի է այնպիսի հարցերի լուծումներ գտնել, ինչպիսիք են պաղեստինյան, աֆղանական և իրաքյան հիմնահարցերը:
«Որոշ մարդիկ մեզ քննադատում են, երբ խոսում ենք Բաղդադի, Քաբուլի, Գազայի, Երուսաղեմի և Պաղեստինի մասին: Մենք ինքներս ենք ձևավորում և իրականացնում մեր արտաքին քաղքականությունը: Արաբները մեր եղբայրներն ու քույրերն են»:
Կարծում ենք, որ այս հայտարարությունները, ինչպես նաև կոնկրետ գործողությունները, հատկապես ներլիբանանյան կարգավորման հետ կապված, խոսում են այն մասին, որ Թուրքիայի «արևելյան» քաղաքականությունն իր օգուտները տալիս է: