Ադրբեջանական Turan լրատվական գործակալության փոխանցմամբ՝ Amnesty İnternational (AI) միջազգային իրավապաշտպան կազմակերպությունը դատապարտել է «Ազատություն» ռադիոկայանի ադրբեջանական ծառայության աշխատակից, լրագրող Հաջիջա Իսմայիլովայի նկատմամբ արդեն մեկ շաբաթ շարունակվող շանտաժը:
Հիշեցնենք, որ մարտի 8-ին Իսմայիլովան իր տնային հասցեով նամակ էր ստացել, որը լի էր ինտիմ լուսանկարներով ու սպառնալիքներով: Նամակում մասնավորապես նշված է եղել, որ եթե նա իրեն լավ չդրսևորի, ապա իրենք խայտառակ կանեն նրան:
Դրանից հետո Իսմայիլովան հայտարարել էր, որ իր համար անակնկալ չի եղել այդպիսի շանտաժը, քանի որ իր լրագրողական գործունեությունը վաղուց անհանգստացնում է կառավարությանը: Նա հիշեցրել էր, որ երկար ժամանակ է, ինչ իրականացնում է լրագրողական հետաքննություն նախագահ Իլհամ Ալիևի ընտանիքի անդամների գաղտնի բիզնեսի շուրջ՝ վեր հանելով ամենաբարձր մակարդակի կոռուպցիոն փաստեր:
Այս կապակցությամբ AI-ի ներկայացուցիչ Ջոն Դալուսենը հայտարարել է. «Հաջիջա Իսմայիլովայի նկատմամբ կիրառվող սադրանքներն ու շանտաժը իշխանական բարձր էշելոններում կոռուպցիայի դեպքերը հետաքննող լրագրողի վարկաբեկմանն ուղղված անամոթ փորձ է:
Այն փաստը, որ Իսմայիլովայի բնակարանում տեղադրվել է թաքնված տեսախցիկ, և այն, որ հետո նկարահանումը տեղակայվել է իբրև թե ընդդիմությանը պատկանող կայքում, վկայում է տվյալ գործընթացին իշխանությունների մասնակցության մասին:
Հասկանալի է նաև, որ այդ սադրանքը հնարվել է այնպես, որ առավելագույն վնաս հասցվի լրագրողի հեղինակությանը, և որ նա հայտնվի ադրբեջանցի պահպանողականների կողմից բռնության ռիսկի տակ: Հատկանշական է նաև, որ այդ քարոզարշավն ուղեկցվում էր ոչ միայն անանուն աղբյուրների, այլև «Ենի Ազերբայջան» պաշտոնաթերթի կողմից:
Բացի այդ, Իլհամ Ալիևը դիմել էր ԱՄՆ-ի ներկայացուցիչներին՝ «Ազատություն» ռադիոկայանի ադրբեջանական ծառայությունից Իսմայիլովային հեռացնելու համար՝ ընդգծելով, որ վերջինս չի սիրում Ադրբեջանի իշխանություններին»: