Մեծ Բրիտանիայի վարչապետ Դևիդ Քեմերոնը ամերիկյան NBC հեռուստաալիքին տված հարցազրույցում հայտարարել է, որ իր երկիրը չի պաշտպանում Իրանի վրա հարձակում գործելու իսրայելական կողմի գաղափարը:
Նրա խոսքերով՝ իսրայելի կողմից հնարավոր ռազմական գործողությունները այս պահին արդարացված չեն: «Չեմ կարծում, որ իսրայելցիները պետք է հենց հիմա գործեն: Մենք նրանց ասել ենք, որ դա անել պետք չէ, և որ մենք չենք աջակցում նման գործողությունները»,- ասել է Քեմերոնը՝ նշելով, որ Իրանի դեմ պատժամիջոցները դեռևս իրենց չեն սպառել:
Այն հարցին, թե ինչքանով է արդյունավետ զսպվածության նման քաղաքականությունը, վարչապետը պատասխանել է, որ իր կարծիքով՝ դա չի կարելի անվանել «զուսպ»: «Ես ճնշումն ուժեղացնելու կողմնակից եմ»,- պարզաբանել է նա: Ընդ որում՝ Քեմերոնը նշել է, որ կտրականապես դեմ է հանդես գալիս Իրանի միջուկային ծրագրին, քանի որ դա կարող է տարածաշրջանում առաջացնել միջուկային սպառազինության մրցավազք:
Ավելի վաղ բրիտանական The Guardian թերթը գրել էր, որ Իրանի դեմ պատերազմի դեպքում Մեծ Բրիտանիան կաջակցի ԱՄՆ-ին: Մասնավորապես խոսքն այն մասին է, որ Լոնդոնը պատրաստվում է ամերիկացիներին որպես օգնություն ուղարկել իր նավերը և սուզանավերը և թույլ տալ ԱՄՆ-ին հերթական անգամ օգտագործել Հնդկական օվկիանոսի Դիեգո Գարսիա կղզում տեղակայված իր ռազմաբազան:
Իսրայելի ղեկավարությունը բազմիցս հայտարարել է, որ Իրանի դեմ պատժամիջոցները չեն աշխատում. այդ երկրի միջուկային ծրագիրը շարունակում է զարգանալ արագ տեմպերով: Իսրայելի կարծիքով՝ շուտով Թեհրանն այնպիսի հաջողությունների կհասնի, որ կկարողանա ամենակարճ ժամկետում միջուկային զենք ստեղծել: Հենց այ պատճառով էլ, Երուսաղեմը կարծում է, որ չպետք է հապաղել հարձակում գործել Իրանի վրա:
Վաշինգտոնում և Եվրոպական մայրաքաղաքներում դրան պատասխանում են, որ Իրանի դեմ պատժամիջոցները դեռ ամբողջ ուժով չեն աշխատում, ուստի նրանց պետք է ևս մեկ հնարավորություն տալ:
