Ռասմուսեն. Մենք Իրանի վրա առավելագույն ճնշումներ գործադրելու կողմնակից ենք

ՆԱՏՕ-ի գլխավոր քարտուղար Անդրես Ֆոգ Ռասմուսենը «BBC Persian» հեռուստաընկերության հետ ունեցած հարցազրույցի ընթացքում այն հարցին, որ եթե Իրանի դեմ ռազմական հարձակում տեղի ունենա, արդյոք ՆԱՏՕ-ն միանալո՞ւ է այդ գործընթացներին, պատասխանել է. «ՆԱՏՕ-ն առհասարակ Իրանի հարցում դերակատար չի եղել, բայց մենք մոտիկից հետևում ենք իրավիճակին և աջակցում քաղաքական ու դիվանագիտական փորձերի միջոցով Իրանի խնդրի կարգավորման գործընթացներին, հետևաբար կողմնակից ենք Իրանի վրա քաղաքական ու դիվանագիտական առավելագույն ճնշումներ իրականացնելու գործընթացներին»։
Ռասմուսենը նաև, զրույցի ընթացքում անդրադառնալով վերջերս Իրանի կողմից աֆղանական սահմանը փակելու փաստին, ավելացրեց. «Իրանը հայտարարում է, որ իր սահմանից Աֆղանստան ներմուծվող վառելանյութը օգտագործվում է Աֆղանստանում տեղակայված ՆԱՏՕ-ի զորամիավորումների կողմից, ուստի դա կանխելու նպատակով է փակել իր սահմանը: Բայց ես պետք է հայտարարեմ, որ ՆԱՏՕ-ի զորամիավորումները բացարձակապես չեն օգտագործում այդ վառելանյութը, և դրանք ներմուծվում են հենց աֆղանցիների օգտագործման նպատակով: Ուստի Իրանի իշխանություններից պահանջում եմ, որ սահմանը բացելով՝ թույլ տան շարունակվի վառելանյութի հոսքը դեպի Աֆղանստան»։