2012թ. մարտի 15-ին Երևանում կայացան միջգերատեսչական խորհրդակցություններ Հայաստանի Հանրապետության և Բելառուսի Հանրապետության ԱԳՆ-ների միջև:
ԱԳՆ մամլո գրասենյակից «Առաջին լրատվական»-ին տեղեկացնում են, որ խորհրդակցությունների ժամանակ հայկական կողմը ներկայացրել է արտգործնախարարի խորհրդական, ԱՊՀ վարչության պետ Արմեն Գևորգյանը, սահմանակից երկրների վարչության պետ Կարեն Միրզոյանը և արտգործնախարարի խորհրդական, մամուլի, տեղեկատվության և հասարակայնության հետ կապի վարչության պետ Տիգրան Մկրտչյանը:
Բելառուսական կողմը ներկայացրել են Բելառուսի Արտաքին Գործերի Նախարարության ԱՊՀ երկրների հետ երկկողմ հարաբերությունների վարչության պետ Նիկոլայ Դեմչուկը և տեղեկատվության վարչության պետ, մամլո խոսնակ Ստեպան Սուխորենկոն:
Խորհրդակցությունների ընթացքում կողմերը քննարկել են Բելառուսի և Հայաստանի միջև համագործակցության հետագա զարգացմանը վերաբերող հարցեր քաղաքական, տնտեսական, տարածաշրջանային և այլ ոլորտներում:
Կողմերը քննարկել են նաև համագործակցությունը միջազգային կազմակերպություններում, ինչպես նաև հանրային դիվանագիտության ոլորտում համագործակցության ընդլայնման հեռանկարները:
