НТВ հեռուստաալիքը ցուցադրել է Մոսկվայում բողոքի ցույցերին մասնակից մարդկանց մասին պատմող ծրագիր: «Հետաքննություն» հաղորդման «Բողոքի անատոմիա» խորագրով ծրագիրը հինգշաբթի երեկոյան է ցուցադրվել հեռուստատեսությամբ:
Ինչպես պնդում են հաղորդման հեղինակները, մարդկանց մի մասը, ովքեր դուրս են գալիս Մոսկվայի փողոցներ վերջին ամիսներին, դրա դիմաց փող են ստացել: Ֆիլմի հեղինակները ցուցադրում են «սենսացիոն» կադրեր, որտեղ ներկայացվում է Բոլոտնայա հրապարակում ցուցարարների գրանցումը «Մեծ սպիտակ օղակ» ակցիայի ժամանակ, ինչպես նաև ֆիքսվում են գումար բաժանելու փաստեր:
Հեռուստաալիքի տվյալներով` իրենց անունները թաքցրած ընդդիմադիրները սադրանքների նպատակով վարձել են «գաստարբայտերների» և նրանց, ովքեր ֆիլմերում ու հեռուստատեսությունում նկարահանվում են զանգվածային տեսարաններում:
НТВ-ի թղթակիցները զրուցել են որոշ մարդկանց հետ, ովքեր շարունակաբար կազմակերպում են «մասովկա» միտինգների համար: Նրանց խոսքով` անհնար է գտնել իրական կազմակերպիչներին, քանի որ ամեն ինչ տեղի է ունենում միջնորդավորված կերպով:
Ծրագրի վերջում ասվում է, որ ԱՄՆ-ը, չնայած տնտեսական ծանր ճգնաժամին, միջոցներ է տրամադրում ռուս ընդդիմությանն օժանդակելու համար և շարունակելու է հետագայում ևս աջակցել վերջիններիս:
