Դատելով համամասնական ընտրացուցակների շուրջ թեկնածուների անունների շրջանառությունից, և նաև մեծամասնական ընտրակարգով առաջադրվող և ՀՀԿ պաշտպանությունը վայելող թեկնածուների ցանկից, կարելի է հստակ եզրակացնել, որ առաջիկա խորհրդարանական ընտրությանը իշխանության պահվածքը բնորոշվում է մեկ բառով՝ ցինիզմ:
Իշխանությունը մի կողմից խոսում է հավատի ու փոփոխությունների մասին, գործարարությունն ու խորհրդարանը տարանջատելու մասին, մյուս կողմից` ընտրությունների է գնում անուններով, որոնք ոչ միայն հավատ չեն ներշնչում, այլև նույնիսկ հակառակ զգացումներն են առաջացնում հասարակության մեջ:
Այս ամենը վկայում է, որ Հայաստանի իշխանությունն անցել է արդեն բարոյական բոլոր հնարավոր արգելքները և առանց արգելակների արդեն առաջ է սլանում: Բայց այդ սլացքը արդեն նմանվում է ոչ թե տիեզերք թռչող հրթիռի, այլ դեպի անդունդը արշավող մեքենայի: Այդ ցինիզմը, որով իշխանությունը նայում է հանրության աչքերին, ինչ-որ խոստումներ տալիս և միևնույն ժամանակ կանաչ ճանապարհ ու խորհրդարանի մանդատներ շնորհում Հայաստանում հաստատված արատավոր քրեաօլիգարխիկ համակարգի կարկառուն ներկայացուցիչներին, ըստ էության խոսում է ավելի շատ իշխանության հոգեվարքի մասին: Այդ անունները, համամասնական ցուցակների աստղային համեմունքները, վկայում են իշխանության սնանկության մասին, և ներկայիս խորհրդարանի ընտրությունը ընդամենը ազդարարելու է այն, որ Հայաստանի իշխանությունն այլևս բանկրոտ է:
Ներկայիս ընտրությունը լինելու է ընդամենը այդ իշխանության վերջին ցոփությունը, երբ քամուն են տրվելու վերջին ռեսուրսները, վարկաբեկվելու են վերջին ծվենները: Իշխանությունը հաղթելու է այս ընտրությունը, բայց հաղթելու է ոչ թե հանրությանը, այլ ինքն իրեն: Հետևաբար իշխանությունն ինքն իրեն էլ պարտվելու է այս ընտրությանը: Եվ իշխանության ենթագիտակցական խորքերում կամ բնազդային մակերևույթի վրա արդեն կա այդ անելանելի սնանկության և անխուսափելի պարտության պատկերացումը, ինչն էլ հենց զարկ է տալիս անասելի ցինիզմին, որովհետև երբ գիտակցում ես, որ ինքդ քեզ ես պարտվելու և հասկանում ես, որ այդ պարտությունից խուսափելու համար ստիպված ես լինելու ինքդ քո հանդեպ ուժ կիրառել, արդեն հասկանում ես, որ անգամ ամենափրկիչ ավանդական ուժը այս դեպքում չի փրկելու անդունդից: Ու դրանից սրվում է ցինիզմը, ինքնամոռաց, ժամանակից ու տարածությունից կտրող, խելագար ցինիզմը:
