ՀԺԱՄ քաղաքական խորհուրդը տարածել է հայտարարություն, որում մասնավորապես ասված է.
Հայաստանի ժողովրդավարական ազատական միություն(ՀԺԱՄ) կուսակցությունը, 2001թ. իր ստեղծման օրվանից Հայաստանի քաղաքական դաշտում զբաղեցրեց կենտրոնամետ դիրք: Մասնավորապես, առաջնորդվելով միջին խավի ձևավորման հրամայականով, կուսակցությունն իր քաղաքական օրակարգի առաջնային խնդիրներից մեկը համարեց փոքր և միջին բիզնեսի համար բարենպաստ պայմանների ապահովումը:
2003թ. խորհրդարանական ընտրություններում ՀԺԱՄ կուսակցության արձանագրած ցուցանիշները ցույց տվեցին կուսակցության ծրագրերի նկատմամբ հասարակության վստահությունը: 2008թ. սկսած ՀԺԱՄ կուսակցությունն իր ծրագրային առաջնահերթությունների մեջ ներառեց երիտասարդության, գիտության և կրթության, գյուղատնտեսության հիմնախնդիրները` հանդես գալով վերջիններիս շահերի պաշտպանությամբ: Կուսակցությունը վստահ է, որ նշված ծրագրերը կարելի է իրականացնել աստիճանական բարեփոխումների ճանապարհով` ապահովելով պետության կայուն զարգացումը: Վերջինս բխում է ՀԺԱՄ կուսակցության կենտրոնամետ գաղափարախոսության բնույթից:
ՀԺԱՄ կուսակցության ծրագրային դրույթներից շատերը վերջին տարիներին եղել են նաև Հայաստանի հանրապետական կուսակցության գործունեության հիմքում: ՀՀԿ կուսակցությունը ևս առաջնորդվում է աստիճանական բարեփոխումների հրամայականով` առաջնահերթ համարելով պետության կայուն զարգացումը:
Հաշվի առնելով վերոնշյալը` ՀԺԱՄ կուսակցության քաղաքական խորհուրդը որոշում է կայացնում` սկսել միավորման գործընթաց Հայաստանի հանրապետական կուսակցության հետ, միասնական ջանքերով վերոհիշյալ խնդիրների լուծման և առաջիկա խորհրդարանական ընտրություններին մասնակցելու համար:
