200 միջազգային իրավապաշտպան կազմակերպություններից բաղկացած կոալիցիան ՄԱԿ-ի Անվտանգության խորհրդում Ռուսաստանին և Չինաստանին կոչ է արել պաշտպանել Սիրիայում բռնության դադարեցմանն ուղղված ջանքերը:
Ինչպես հաղորդում է BBC-ն, կոչը հնչել է Սիրիայում երկրի նախագահ Բաշար Ալ-Ասադի դեմ բողոքի ցույցերի սկսվելու տարելիցի կապակցությամբ:
Իրավապաշտպանների կոալիցիայի մեջ են մտնում այնպիսի կազմակերպություններ, ինչպիսիք են Human Rights Watch-ը, Christian Aid-ը, Մարդու իրավունքների միջազգային ֆեդերացիան, Քաղաքացիական մասնակցության համաշխարհային դաշինքը: Նրանց միացել են մշակույթի հայտնի գործիչներ, այդ թվում՝ բրիտանացի գրող և դերասան Սթիվեն Ֆրայը և կանադացի երգչուհի Նելի Ֆուրտադոն:
Իրավապաշտպանները դիմել են ՄԱԿ-ի ԱԽ՝ խնդրանքով. ընդունել Սիրիայի դեմ բանաձև, որը կստիպի Բաշար Ալ-Ասադին դադարեցնել արյունահեղությունը երկրում:
Հայտարարության մեջ ասվում է, որ աշխարհի 27 երկրների 200 ոչ կառավարական կազմակերպություններից բաղկացած կոալիցիան «պահանջում է, որպեսզի ՄԱԿ-ի ԱԽ-ն անհապաղ հարթի տարաձայնությունները և ընդունի բանաձև, որով կոչ կարվի Սիրիայի կառավարությանը դադարեցնել անկանոն կրակը բնակելի թաղամասերի վրա, կամայական ձերբակալությունները, խոշտանգումները և անհապաղ կերպով թույլ տալ հումանիտար աշխատակիցների, լրագրողների և մարդու իրավունքների դիտորդների մուտքը երկիր»:
«Ռուսաստանը և Չինաստանը երկու անգամ արգելափակել են Անվտանգության խորհրդի բանաձևը՝ պաշտպանելով Ասադին, ինչը նա ընկալում է որպես սպանությունների արտոնագիր»,- ասել է Human Rights Watch-ի գործադիր տնօրեն Քեննեթ Ռոսը:
Ուղիղ մեկ տարի առաջ՝ 2011թ. մարտի 15-ին, լրատվական գործակալությունների լրահոսներում տեղեկություն տարածվեց, որ Սիրիայում սկսվել են երկրի ղեկավարի դեմ ուղղված հակակառավարական ցույցեր: Մեկ տարվա ընթացքում Սիրիայում զոհվել են հազարավոր մարդիկ: Նրանց հստակ թիվը հնարավոր չէ նշել, քանի որ օտարերկրյա լրագրողների և իրավապաշտպանների մուտքն արգելված է: ՄԱԿ-ի վերջին տեղեկությունների համաձայն՝ զոհերի թիվը գերազանցում է 8000-ը:
Նշենք, որ Սիրիայի վարչակարգը կատարվածի ողջ պատասխանատվությունը դնում է «զինված ահաբեկչական խմբավորումների վրա»:
