Բնական է, որ հարյուր տոկոսով համամասնական ընտրակարգին դեմ հանդես գալուց հետո ՀՀԿ-ն մեծամասնականով հնարավորինս շատ առաջադրումներ պետք է աներ: «Առաջին լրատվական»-ի հետ զրույցում նման տեսակետ հայտնեց ՀՅԴ պատգամավոր Ռուզան Առաքելյանը՝ մեկնաբանելով Հանրապետական կուսակցության նման որոշումը:
«Բայց սա դեռ չի նշանակում, որ այն ընտրատարածքներում, ուր ՀՀԿ-ն թեկնածուներ է առաջադրել, չեն կարող այլ թեկնածուներ լինել: Եթե մենք պայքարենք, որ ընտրություններն արդար ու թափանցիկ լինեն, որ մրցակցությունն ազնիվ լինի, բնականաբար կհաղթի այն ուժը կամ թեկնածուն, ով ժողովրդի կողմից իսկապես ընդունված կլինի: Այնպես որ, զարմանալի ոչինչ չկա. ՀՀԿ-ն տվյալ տարածքում կառաջադրի իր թեկնածուին, մյուս ուժերն՝ իրենց»,- ասաց ՀՅԴ պատգամավորը:
Նշենք, որ երեկ՝ մարտի 13-ին, տեղի ունեցած ՀՀԿ գործադիր մարմնի նիստում, որը վարել է նախագահ Սերժ Սարգսյանը, որոշվել է մոտ 33 ընտրատարածքներում մեծամասնականով թեկնածուներ առաջադրել: Առաջադրվողների ցանկը կհստակեցվի առաջիկա մեկ-երկու օրում:
