Կրասնոդարի մարզում «Բնապահպանական հերթափոխ» շարժման ակտիվիստ Սուրեն Ղազարյանին բերման են ենթարկել Տուապսե քաղաքի ոստիկանական բաժանմունք: Այս մասին հայտնում է «Ազատություն» ռադիոկայանի ռուսական ծառայությունը: Նրան մեղադրանք է առաջադրվել «Ագրոկոմպլեքս» ընկերության գույքը փչացնելու մեջ:
Այդ մասին հայտարարել է ինքը՝ բնապահպանը, Twitter սոցցանցում: Ավելի վաղ «Ազատություն» ռադիոկայանի հետ զրույցում նա հայտնել էր, որ իրեն ձերբակալել են իր փաստաբան Վիկտոր Դուտլովի հետ Տուապսեում «Ագրոկոմլեքս»-ին պատկանող շինություններից մեկի մոտ:
Այնտեղ, ըստ Ղազարյանի, գտնվում է Կրասնոդարի մարզի նահանգապետ Ալեքսանդր Տկաչևի ամառանոցը:
Բնապահպաններն անօրինական են համարում այդ հատվածի պարսպապատումը, որը ներառում է հարակից անտառից հատված և ծովափը, որտեղ գտնվում են «Ագրոկոմլեքսի» շինությունները:
Ակտիվիստը պնդում է, որ ծեծի է ենթարկվել ընկերության անվտանգության աշխատակիցների կողմից:
