Մաշտոցի պուրակում գիշերել է 27 ակտիվիստ: Այս մասին «Առաջին լրատվական»-ին տեղեկացրեց «Թռչկան» քաղաքացիական նախաձեռնության անդամ, բնապահպանական ակտիվիստ, գիշերը նստացույցին մասնակցած Կարեն Մարությանը: Նա նշեց, որ ոստիկանները թույլ են տվել միայն մեկ վրան պատրաստել գիշերվա համար, որում գիշերել են 4-5 ակտիվիստ, մի քանիսը գիշերն անցկացրել են քնապարկերի մեջ, 4 հոգի՝ նստարանների վրա ծածկված, իսկ մնացածը զբոսնել են, երգել և հերթով փոխարինել միմյանց:
«Կան մարդիկ, ովքեր իսկապես քնեցին, իսկ ոմանք պարզապես լավ ժամանակ անցկացրին»,- ասաց ակտիվիստը: Նա հույս հայտնեց, որ նստացույցի մասնակիցների թիվը կավելանա, և նույն մարդիկ անընդհատ չեն գիշերի պուրակում: Ըստ նրա` այդպես շատ բարդ կլինի ակտիվիստների համար, որովհետև կհոգնեն, սակայն այդ պայմաններում ևս պատրաստ են նստացույցը շարունակել՝ մինչև քաղաքապետարանը որոշում չկայացնի ապամոնտաժել Մաշտոցի պուրակում տեղադրված կրպակները:
Հիշեցնենք, որ Մաշտոցի պուրակում տեղադրված կրպակների ապամոնտաժման համար պայքարող «Մենք ենք այս քաղաքի տերը», «Մեր քաղաքը», «Թռչկան» քաղաքացիական նախաձեռնությունների երիտասարդները կրպակներն ապամոնտաժելու համար վերջնաժամկետ են ներկայացրել քաղաքային իշխանություններին, այլապես կրպակները նրանք կապամոնտաժեն իրենց իսկ ուժերով:
