Սերժ Սարգսյանին ուղղված բաց նամակում ՀՀ նախկին վարչապետ Հրանտ Բագրատյանը նշել էր, որ վերջին 5 տարում աշխատողների իրական եկամուտներն աճել են ոչ թե 40.4, այլ 6.2%-ով, իսկ աղքատությունը 23%-ից 11.2%-ի իջեցնելու փոխարեն այսօր ունենք 35% ցուցանիշ: Այս թվերը մեկնաբանելու խնդրանքով «Առաջին լրատվական»-ը դիմեց ՀՀԿ պատգամավոր, ԱԺ սոցիալական հանձնաժողովի նախագահ Հակոբ Հակոբյանին, ով սակայն հրաժարվեց պատասխանել. «Հիմա ինչքան քաղաքական ուժ կա, դրա մասին կխոսի: Կարծում եմ, իմ խոսելը տեղին չի, բոլորի հացը կկտրեմ, թող իրանք արտահայտվեն»:
Հարցին՝ ի՞նչ հնարավորություն կար, որ աղքատության մակարդակը այդ ցուցանիշին չհասներ, Հ. Հակոբյանը պատասխանեց. «Եթե մեզ մեղադրում են արտաքին պարտքի ավելացման մեջ, հստակ ասեմ, որ արտաքին պարտքի մոտ 70%-ը բաժին է ընկնում սոցիալական ոչ մի ծրագիր չխաթարելու համար: Ինչքանո՞վ կա հնարավորություն: Հնարավորությունը տնտեսության զարգացումն է ստեղծում և տնտեսության զարգացման արդյունքում մենք այդ հնարավորությունները պետք է ավելացնենք, որովհետև դա կյանքի պահանջ է, հասկանալի ու պարզ կյանքի պահանջ»:
Նա համեմատություն անկացրեց Հունաստանի հետ՝ նշելով, թե երկիրը չդիմացավ, և հիմա էլ այդ երկիրը ֆինանսավորում են մասնավոր անձերն ու ձեռնարկությունները, որպեսզի կարողանան դեֆոլտից պրծնել. «Ճգնաժամի արդյունքում մի երկիր այդպես գնաց, մի երկիր էլ այսպես գնաց»:
