Ռուսական ВЗГЛЯД թերթի փոխանցմամբ՝ Վրաստանի ընդդիմադիր Լեյբորիստական կուսակցությունը սկսել է Աֆղանստանում ՆԱՏՕ-ի առաքելությանը Վրաստանի մասնակցության նպատակահարմարության վերաբերյալ հանրաքվե անցկացնելու իր արշավը:
Այդ նպատակով վրաց լեյբորիստները դիմել են Կենտրոնական ընտրական հանձնաժողով և սկսել են բնակչության շրջանում կազմակերպել ստորագրահավաք: Որպեսզի Վրաստանի խորհրդարանը դիտարկի այդ հարցը, անհրաժեշտ է 30,000 քաղաքացու ստորագրություն:
Իսկ տվյալ հարցը հանրաքվեի դնելու համար անհրաժեշտ է խորհրդարանի սահմանադրական մեծամասնությունը, որը ներկայիս դրությամբ ունի նախագահ Սաակաշվիլիի գլխավորած «Ազգային միասնական շարժումը»:
Ներկայիս դրությամբ Աֆղանստանում են գտնվում 925 վրացի զինծառայողներ: Սաակաշվիլին ցանկանում է այդ ցուցանիշն այս տարի ավելացնել ևս 750-ով, որով Վրաստանը կդառնա ՆԱՏՕ-ի անդամ չհանդիսացող երկրների թվում Աֆղանստանում ամենամեծ զինվորական կոնտինգենտ ունեցող երկիրը: Ընդհանուր առմամբ, Աֆղանստանում զոհվել է 15 վրացի զինծառայող:
Հիշեցնենք, որ նախորդ տարվա հունիսի կեսերին էլ վրաց լեյբորիստները կոչով դիմել էին վրացի զինծառայողների հարազատներին ու մերձավորներին, որպեսզի նրանք արգելեն իրենց զավակներին Աֆղանստան ուղարկել.
«Վաղուց Վրաստանը ԱՄՆ-ի և ՆԱՏՕ-ի համար վերածվել է թնդանոթի մսի արտադրամասի։ ՆԱՏՕ-ի անդամ շատ երկրներ իրենց զինծառայողներին չեն ուղարկում Աֆղանստան, մինչդեռ մեր երեխաների հետ նման կերպ վարվում է Սաակաշվիլին։ Դրանով նա ցանկանում է պահպանել իր իշխանությունը։
Մենք պահանջում ենք, որպեսզի ՆԱՏՕ-ն չօգտվի վրացի ժողովրդի անհաջողությունից և հրաժարվի իր օպերացիաներում վրացի զինծառայողներին ներգրավելուց»։