Մարտի 13-ին ԱԺ փոխնախագահ Էդուարդ Շարմազանովը հանդիպեց Երևանի պետական համալսարանի և Երևանի Վալերի Բրուսովի անվան պետական լեզվաբանական համալսարանի ուսանողների հետ: Պարոն Շարմազանովի և համալսարանականների միջև ծավալվեց անկեղծ ու անմիջական երկխոսություն: Ուսանողներին հետաքրքրում էին ինչպես երկրում տիրող ներքաղաքական իրավիճակն ու նախընտրական զարգացումները, այնպես էլ արտաքին քաղաքական իրադարձությունները:
Համալսարանականները Էդուարդ Շարմազանովին խնդրել են իր մոտեցումները ներկայացնել Հայաստանի և մերձբալթյան երկրների միջև փոխգործակցության ընթացիկ և հեռանկարային զարգացումների, ինչպես նաև հայ-վրացական հարաբերությունների ներկա մակարդակի վերաբերյալ: ԱԺ փոխնախագահը նշել է, որ Հայաստանը հստակ քաղաքականություն է իրականացնում եվրաինտեգրման խորացման ուղղությամբ` օրենսդրությունը համապատասխանեցնելով եվրոպական չափանիշներին: Այս համատեքստում նա կարևորեց առաջիկա խորհրդարանական ընտրությունները և հավաստիացրեց, որ Հայաստանի իշխանությունները պատրաստ են իրականացնելու ժողովրդավարական ընտրություններ: ԱԺ փոխնախագահը բարձր գնահատեց մերձբալթյան երկրների հետ Հայաստանի հարաբերությունները: Նա տեղեկացրեց, որ վերջերս Լիտվա կատարած այցի ժամանակ լիտվացի իր գործընկերները վստահեցրել են, որ եվրաինտեգրման ճանապարհին ակտիվորեն կաջակցեն Հայաստանին: ԱԺ փոխնախագահի գնահատմամբ` այս ոլորտում լիտվական փորձը ուսանելի կարող է լինել հայկական կողմի համար:
Էդուարդ Շարմազանովը կարևորել է նաև հայ-վրացական հարաբերությունները, որոնք պատմականորեն բարեկամական են եղել: ԱԺ փոխնախագահը Վրաստանի հետ հարաբերությունները կարևորել է նաև ստրատեգիական առումով: Հայաստանը Թուրքիայի և Ադրբեջանի կողմից շրջափակման մեջ է, և չնայած հայ-թուրքական սահմանը բացելու միջազգային հանրության կոչերին` Թուրքիան շարունակում է շրջափակման իր քաղաքականությունը: Քաղաքական այս իրավիճակում Վրաստանը մնում է մեր երկիրը արտաքին աշխարհի հետ կապող կարևորագույն օղակներից մեկը:
Ուսանողներից մեկի այն հարցին, թե արդյոք իշխանություններն ընդդիմադիր գործիչների քննադատությունները հաշվի են առնում, ԱԺ նախագահի տեղակալը պատասխանել է, որ բազմաթիվ են դեպքերը, երբ ընդդիմության և իշխանության ներկայացուցիչները համագործակցում են օրենքների նախագծերի մշակման հարցում: Նա նշել է, որ միջազգային դիվանագիտական կառույցներում ևս իշխանության և ընդդիմության ներկայացուցիչները համագործակցում են ի շահ մեր պետության: «Միշտ չէ, որ ընդդիմությունը սխալ է, և միշտ չէ, որ իշխանությունը ճիշտ է»,- ասաց Էդուարդ Շարմազանովը:
Երևանի պետական համալսարանի ուսանող Էրիկ Ստեփանյանին մտահոգում էր Իրանի շուրջը ստեղծված լարվածությունը և հետաքրքրում այն հարցը, թե պատերազմական գործողությունների դեպքում Հայաստանի համար ինչ վտանգներ կլինեն: Պարոն Շարմազանովի կարծիքով` Իրանում, ինչպես նաև Սիրիայում իրավիճակի ապակայունացումը Հայաստանում հումանիտար ճգնաժամի պատճառ կդառնա: Նա համոզված է, որ պատերազմը ցավալի հետևանքներ կունենա մեր երկրի համար, քանի որ Իրանը եզակի ճանապարհ է Հայաստանի համար: «Մենք կողմ ենք Իրանի խնդրի խաղաղ լուծմանը»,- նշեց ԱԺ փոխնախագահը:
Պարոն Շարմազանովը ուսանողների խնդրանքով անդրադարձել է նաև կրթական բարեփոխումներին` ընդգծելով, որ կրթությունը զգայուն ոլորտ է, և այստեղ յուրաքանչյուր փոփոխություն պետք է զգույշ կատարել: «Ես կարծում եմ, որ պետք է դյուրացնել ընդունելությունը և դժվարացնել բուհ-ը ավարտելը, որպեսզի, իրոք, ավարտեն լավագույն մասնագետները»,- նշեց նա:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ հանդիպման ժամանակ անդրադարձ է եղել նաև «Եվրատեսիլ-2012» երգի մրցույթին հայկական կողմի չմասնակցելու, ԼՂ-ի հիմնախնդրի կարգավորման, Երևանի մաքրության, արտագաղթը կասեցնելու խնդիրներին:
