Նյու Յորքից անհայտ բարերարը աճուրդի շրջանակներից դուրս գնել է Տիտանիկի բժիշկ Ջոն Էդվարդ Սիմփսոնի կողմից իր մորը հասցեագրված նամակը և պատրաստվում է այն վերադարձնել Բելֆաստ՝ բժշկի հայրենի քաղաք: Այս մասին հաղորդում է BBC-ն:
Սիմփսոնը 37 տարեական է եղել, երբ նավը խորտակվել է: Այդ ժամանակ նա ուներ կին և փոքրիկ երեխա:
Նախքան «Տիտանիկի» վրա հայտնվելը՝ Սիմփսոնն արդեն աշխատել էր այդ ժամանակի մեկ այլ սոպերանավում՝ «Օլիմպիկում»: Նավի ֆիրմային բլանկի վրա գրված նամակում բժիշկն իր մորը պատմել է, որ իր մոտ ամեն ինչ լավ է, և ստորագրել էր. «Քեզ ամուր սիրող՝ Ջոն»: Նամակը «ափ է հասել» Իռլանդիայի Կով քաղաքում, որտեղից «Տիտանիկը» վերցրել էր վերջին ուղևորներին մինչև Ատլանտյան օգկիանոս մտնելը:
Վերջին անգամ նամակը Բելֆաստում ներկայացվել է 1940-ական թթ., սակայն մարտի սկզբին Սիմփսոնի ժառանգներն անհանգստություն էին հայտնել, որ այն այլևս չի վերադառնա Բելֆաստ այն բանից հետո, երբ նամակն աճուրդի էր հանվել Նյու Յորքում՝ 34 հազար դոլար նախնական գնով:
Բժշկի ժառանգները հանգանակություն են կազմակերպել այն գնելու համար, սակայն նախքան աճուրդը նամակը գնել է անհայտ բարերարը և խոստացել այն վերադարձնել Հյուսիսային Իռլանդիա: Ակնկալվում է, որ նամակը կդառնա «Տիտանիկին» նվիրված նոր մշտական ցուցահանդեսի նմուշ. այն նախատեսվում է բացել մարտի վերջին Բելֆաստում:
Ականատեսների վկայությամբ՝ բժիշկը մինչև վերջին պահը եղել է նավում՝ չփորձելով փրկվել նավակներում, և օգնել է մյուսներին:
