Այս տարի իրանական Նոր տարվա՝ Նովրուզի կապակցությամբ ՀՀ պարսիկ զբոսաշրջիկների մուտքը մոտ 50%-ով կպակասի: «Առաջին լրատվական»-ի հետ զրույցում նման գնահատական տվեց Հայաստանի տուրօպերատորների միության նախկին նախագահ, Տուրիզմի հայկական ինստիտուտի ռեկտոր Ռոբերտ Մինասյանը: Նա պարզաբանեց, որ զբոսաշրջիկներին մեր երկիր գրավելու համար ոչ մի բան չի արվել, նույնիսկ այնքան սխալ բուկլետներ են տպագրում ՀՀ վերաբերյալ:
«Պետք է կարգավորել, պետությունը պետք է կարգավորիչ դեր ունենա: Ինչ ասես, չեն պատմում Հայաստանի մասին: Մարդիկ ուզում են գան, բայց թե՛ գները, թե՛ ամեն ինչը խանգարում է: Գիդ չկա, բուկլետ չկա, երկրում տուրիզմով պատասխանատու մարդ չկա, կոորդինացնող չկա: 2003-ին օրենք ընդունել ենք, իսկ ենթաօրենքները ո՞վ պետք է կարգավորի: Մեր ԱԺ-ն 20 տարի է օրենք է ընդունում, չի կարողանում դաշտը կարգավորել: Այսօր տուրիզմը հարկային դաշտում չի, ով ոնց ուզում, աշխատում է: Հա, լիբերալիզացիա ասեցինք, բայց հո էդպես չի կարելի»,- ասաց Ռ. Մինասյանը:
