ԱՄՆ հանրապետական կոնգրեսական Ուոլթեր Ջոնսը Ներկայացուցիչների պալատ է մտցրել բանաձևի նախագիծ, ըստ որի՝ առանց Կոնգրեսի հավանության Սիրիայի դեմ պատերազմ սկսելու դեպքում Օբամային կարող են իմփիպչմենթ հայտարարել: Բանաձևի նախագծի տեքստը հրապարակված է Ներկայացուցիչների պալատի կայքում:
Նախկին կոնգրեսական Թոմ Թանկրեդոն պարզաբանել է, որ Ջոնսի գործողությւոնները կապված են ԱՄՆ-ի կողմից Սիրիայի դեմ հնարավոր պատերազմ սկսելու հետ: Բանաձևի նախագիծ մշակելու համար անմիջական առիթ է հանդիսացել երկրի պաշտպանութան նախարար Լեոն Պանետայի հայտարարությունը: Դրանից հետևում էր, որ Օբաման Սիրիայի դեմ ռազմական գործողություններ սկսելու դեպքում չի դիմի Կոնգրեսին:
Նշենք սակայն, որ մինչ այս պահը Օբամայի վարչակազմը նման արշավ սկսելու մտադրություն չի հայտնել: Ավելին, ԱՄՆ պետքարտուղար Հիլարի Քլիթոնը նշել է, որ ռազմական միջամտությունը քաղաքացիական պատերազմ կհրահրի Սիրիայում:
Ռազմական գործողությունների դիմելու դեպքում ԱՄՆ նախագահի լիզաորությունները մշտապես քննարկվում են: Օբամային իմփիչմենթ հայտարարելու սպառնալիքներով անցյալ տարի հանդես էր գալիս կոնգրեսական Դենիս Կուսինիչը Լիբիայի գործերին ռազմական միջամտության ժամանակ: Հիշեցնենք. այդ ժամանակ Օբաման չդիմեց Կոնգրեսին հավանություն ստանալու համար, պարզապես նամակով տեղեկացրեց այդ մասին:
1973 թ. Կոնգրեսի կողմից ընդունված՝ նախագահի ռազմական լիազորությունների մասին բանաձևում ասվում է, որ երկրի սահմաններից դուրս, առանց Կոնգրեսի հավանության, նախագահը կարող է ռազմական գործողություններ վարել ոչ ավելի, քան 60 օր (ևս 30 օր տրվում է զորքերը դուրս բերելու համար):
