Ընտրությունների արդյունքների կեղծումն առաջին հերթին անդրադառնում է քաղաքացու ապրելակերպի վրա: Այսօր կայացած քննարկման ժամանակ ասաց «Ազատ դեմոկրատներ» կուսակցության վարչության նախագահ Խաչատուր Քոքոբելյանը՝ շեշտելով դրանց արդար ու թափանցիկ անցկացման անհրաժեշտությունը:
«Օրինակ՝ Հրազդանում ինչ-ինչ գործընթացների հետևանքով ընտրությունների արդյունքների սխալ արտապատկերում կատարվեց: Բացի այդ, իշխանությունները հարյուր տոկոսանոց համամասնական ընտրակարգին անցում կատարելու քաղաքական կամք չդրսևորեցին: Մինչդեռ ՀՀ իրավիճակն ուղղակի պարտադրում է դա: Հիմնական ընտրակեղծիքների մեքենան աշխատում է հենց մեծամասնական ընտրակարգը գործի դնելու պարագայում»,- ասաց նա:
Քոքոբելյանի խոսքով՝ ԱԺ ընտրություններով մեկնարկ է տրվում մի նոր ժամանակաշրջանի, որը կավարտվի նախագահական ընտրությունների ժամանակ:
«ՀՀԿ-ն պետք է շահագրգիռ լինի լավ ընտրություններ անցկացնելով, ինչը չի նշանակում, թե նա պատրաստ է դրան: Ինչ վերաբերում է ընտրությունների հասարակական վերահսկողությանը, ապա այդ ողջ գործընթացն ընկնում է կուսակցությունների վրա: Միաժամանակ, քաղաքական ուժերի բանիմաց վստահված անձինք շատ հաճախ կարողանում են փոխել տվյալ ընտրատեղամասում տիրող իրավիճակը»,- ասաց նա:
«Ազատ դեմոկրատներ» կուսակցության նախագահի խոսքով՝ հայաստանյան ընդդիմությունը մեկ խնդիր ունի լուծելու՝ միասնական ուժերով պահպանել, վերահսկել սեփական քվեները:
«Այս անգամ, կարծես, ընդդիմադիր դաշտի կուսակցությունների մոտ առկա է նման պատրաստակամություն: Միաժամանակ, ընտրությունները կեղծելու կամ չկեղծելու առաջին պատասխանատուն պետք է դառնա պետությունը:
Ճիշտ չեմ համարում, որ ՀՀ նախագահը ղեկավարի որևէ կուսակցության ցուցակ: Բայց հենց սա էլ ակնհայտ է դարձնում, որ իշխանական բոլոր ռեսուրսներն աշխատելու են հօգուտ ՀՀԿ-ի, ինչը շատ վատ է»,- նշեց Քոքոբելյանը:
Ամփոփելով՝ քաղաքական գործիչը նկատեց, որ երկրում առկա ներկա իրավիճակի համար ամբողջ պատասխանատվությունն ընկնում է կոալիցիոն երեք կուսակցությունների՝ ՀՀԿ-ի, ԲՀԿ-ի ու ՕԵԿ-ի վրա: «Իհարկե, պատասխանատվության առյուծի բաժինը ՀՀԿ-ինն է, հետո միայն ԲՀԿ-ինն ու ՕԵԿ-ինը»,- ասաց նա:
