ИТАР-ТАСС-ի փոխանցմամբ՝ Թուրքիայի հիմնական ընդդիմադիր ուժը՝ Ժողովրդա-հանրապետական կուսակցությունը (ԺՀԿ), երեկ բողոքի ակցիա է իրականացրել՝ ընդդեմ Մալաթիայի նահանգի Քյուրեջիք վայրում ՆԱՏՕ-ի հակահրթիռային պաշտպանության համակարգի տեղակայման:
Ակցիային մասնակցել են ԺՀԿ-ի 10 պատգամավորներ՝ կուսակցության խորհրդարանական խմբակցության փոխնախագահ Էմինե Ուլկեր Թարհանի գլխավորությամբ: Նրանք հագել են հատուկ շապիկներ, որոնց վրա գրված է եղել «Ո՛չ հակահրթիռներին»:
Նրանք ընդգծել են, որ այսուհետ Քյուրեջիքի բնակիչները պետք է ամերիկացի զինծառայողներից թույլտվություն հարցնեն իրենց սեփական տարածքում շրջելու համար: Ակցիան անցել է առանց միջադեպերի, որից հետո ընդդիմադիր պատգամավորները լքել են Քյուրեջիքը:
Հիշեցնենք, որ Թուրքիայի տարածքում ՆԱՏՕ ռադիոտեղորոշիչ կայանի (ՌՏԿ) տեղակայման մասին հուշագիրը Թուրքիան ու ԱՄՆ-ը ստորագրել են սեպտեմբերի 14-ին Անկարայում:
