ՀՀ ոստիկանության հասարակայնության և լրատվության վարչությունը տեղեկացնում է, որ մարտի 10-ին, ուշ երեկոյան սպանություն է տեղի ունեցել Երևանի Ներքին Չարբախ թաղամասում:
Յուրի Թադևոսյանը որսորդական զենքով սպանել է Վարդան Վարդանյանին, այնուհետև հրազենային վնասվածք հասցրել Դավիթ Բաղդասարյանին:
Կատարվում է նախաքննություն:
Ըստ չճշտված տեղեկությունների՝ սպանվածը Թադևոսյանի նախկին կնոջ եղբայրն է, իսկ Դավիթ Բաղդասարյանը մահացողի կնոջ եղբայրն է:
Դեպքի առթիվ ոստիկանության լրատվական ծառայությունը քիչ առաջ տարածել է հաղորդագրություն, որում մասնավորապես ասված է.
Մարտի 9-ին, ժամը 22.50-ին, «Էրեբունի» բժշկական կենտրոնից ոստիկանության Շենգավիթի բաժնում հաղորդում է ստացվել, որ Ներքին Չարբախի 1-ին փողոցից դեպի Արարատի մարզի Նորաբաց գյուղ տանող ճանապարհին գտնվող խորտկարանից հրազենային վնասվածքներով իրենց մոտ բուժօգնության են տեղափոխվել 1981 թ. ծնված Վարդան Վարդանյանը և 1988 թ. ծնված Դավիթ Բաղդասարյանը:
Ժամը 23.45-ին Վարդան Վարդանյանը գիտակցության չգալով հիվանդանոցում մահացել է:
Դեպքի վայրի զննությամբ հայտնաբերվել է 12 մմ տրամաչափի որսորդական հրացանի կրակված 7 պարկուճ:
Նույն օրը, ժամը 22.20-ին, ոստիկանության Մալաթիայի բաժին է ներկայացել 1961 թ. ծնված Յուրիկ Թադևոսյանը և խոստովանել, որ ժամը 22.10-ի սահմաններում Ներքին Չարբախ թաղամասում գործող խորտկարաններից մեկում իրեն պատկանող որսորդական հրացանից կրակել է իր աներորդի Վարդան Վարդանյանի և վերջինիս աներորդի Դավիթ Բաղդասարյանի ուղղությամբ, որից հետո խորտկարանի դիմաց կայանված, Վարդան Վարդանյանին պատկանող «Օպել» մակնիշի ավտոմեքենայով հեռանալով դեպքի վայրից` ներկայացել Մալաթիայի բաժին:
Յուրիկ Թադևոսյանը ներկայացրել է իր անվամբ հաշվառված «Բայկալ» տիպի որսորդական հրացանը` առանց փամփուշտների:
Հրացանն առգրավված է:
Կատարվում է նախաքննություն:
