Առաջիկա հինգ տարիներին ԱՄՆ-ը ստիպված կլինի օգտվել ռուսական հրթիռներից` ծախսելով 2250 միլիոն դոլար: Այդ մասին ԱՄՆ Կոնգրեսին հայտնել է NASA-ի ղեկավար Չարլզ Բոլդենը:
Ինչպես տեղեկացնում է Коммерсант թերթը, Բոլդենը հայտարարել է, որ միայն 2017 թ. ԱՄՆ-ը ի վիճակի կլինի առանց Ռուսաստանի օգնության իր անձնակազմն ուղարկել Միջազգային տիեզերական կայան: Ըստ Բոլդենի՝ դրա պատճառը նախորդ տարիների անհաջող պլանավորումն է, և այժմ «ստիպված այն շտկվում է»:
Ավելի վաղ «Ռոսկոսմոսը» և NASA-ն 753 միլիոն դոլարի երկու տարվա պայմանագիր էին ստորագրել: Ըստ պայմանագրի՝ ռուսական հրթիռները 2014-2015թթ. ամերիկացի տիեզերագնացներին պետք է հասցնեն Միջազգային տիեզերական կայան:
NASA-ն ենթադրում է, որ 1,3 միլիարդ դոլար կծախսվի Միջազգային տիեզերական կայան տիեզերագնացների և բեռների տեղափոխման համար, իսկ ուղեծրային կայանի շահագործման համար` 3 միլիարդ դոլար:
