Ջերմուկ քաղաքում մարտի 13-ին տեղի կունենա համաժողով «Ամուլսարի ոսկու հանքի ազդեցությունը» թեմայով: Այս մասին տեղեկացնում է «Ջերմուկի զարգացման կենտրոնը»: Քանի որ բնակչությունն անհանգստացած է շրջանառվող տեղեկություններից, «Ջերմուկի զարգացման կենտրոնը» հանձն է առել կազմակերպել վերոնշյալ համաժողովը և ստանալ բնակչությանը հուզող հարցերի պատասխանները:
Համաժողովին հրավիրված են Ջերմուկի քաղաքապետ Վարդան Հովհաննիսյանը, ՀՀԿ Ջերմուկի տարածքային խորհրդի նախագահ Էդգար Ղազարյանը, «Գեոթիմ» ընկերությունը, երկրաբանական գիտությունների թեկնածու, ԳԱԱ երկրաբանության ինստիտուտի լաբորատորիայի վարիչ Ռուբեն Յադոյանը, գեոդեզիստ Ռոմիկ Աբրահամյանը, «Հայաստանի անտառներ» ՀԿ, իրավաբան Նազելի Վարդանյանը, «Վայրի բնության համաշխարհային հիմնադրամի» hայաստանյան գրասենյակի տնօրեն Կարեն Մանվելյանը, «Էկոլուր» ՀԿ տնօրեն Ինգա Զառաֆյանը, գործարարներ Ստեփան Ավագյանը, Հակոբ Հակոբյանը, ինչպես նաև բժիշկներ, բնապահպան-ակտիվիստներ:
«Ջերմուկի զարգացման կենտրոնը» հույս է հայտնում, որ համաժողովը կընթանա առողջ մթնոլորտում և հարցերին կտրվեն սպառիչ պատասխաններ:
