Մի քանի օրից սկսվող իրանական Նոր տարվա՝ Նովրուզի տոներին եթե Հայաստան մոտ 10 հազար զբոսաշրջիկ գա, մենք կուրախանանք: «Առաջին լրատվական»-ի հետ զրույցում ասաց Իրան-Հայաստան զբոսաշրջային այցելություններ կազմակերպող գործակալություններից «ՏԱԹԵՎ-Տ.Տ.Տ.» ընկերության տնօրեն Առլեն Դավուդյանը: Այս վատատեսության համար որպես հիմք նա նշեց 2 պատճառ՝ ՀՀ-ում հյուրանոցներն անցած տարվա համեմատ թանկացել են և Իրանում դոլարի փոխարժեքը մոտ 70%-ով միանգամից բարձրացել է:
Ա. Դավուդյանը տեղեկացրեց, որ հյուրանոցները դեռ դեկտեմբերից կանխավճար են պահանջել, հետո մերժել են, թե տեղ չկա, բայց հիմա իրենք են խնդրում. «Անցած տարվա համեմատ 11-14 հազար դրամով մի գիշերակացը թանկացրել են: Մարտն ընդհանրապես մեռած սեզոն է զբոսաշրջային առումով, պարզապես Իրանում է տոն, և մարդիկ ուզում են դուրս գալ»: Նրա խոսքով՝ Դուբայի հետ հարաբերությունները ներկայում վատացել և գրեթե խզվել են, եթե Վրաստանը պայմաններ ստեղծի, միանշանակ կտեղափոխվեն այնտեղ: Ընդհանրապես պարսիկ զբոսաշրջիկները շուկայում ավելացել են մոտ 10-25%-ով, բայց միայն մարտին արդեն 3 տարի է, ինչ հետզհետե նվազում է զբոսաշրջիկների թիվը:
«Մարդիկ, որ այդքան գումար են տալիս, չեն ստանում համարժեք ծառայություն: «Անի» հյուրանոցում երկտեղանոց համարի գինը 56 հազար դրամ է (120 դոլար), մարտի համար դա աբսուրդ է: Նույն պայմանները Մալայզիայում 70-80 դոլարով են ստանում, այն էլ՝ 5 աստղանի հյուրանոց, մասնավոր ծովափ և այլ ծառայություններ, որ չես համեմատի մեր երկրի հետ: Այս տարի միայն համերգների համար են գալիս: Նովրուզի առաջին 5 օրը նախատեսվում են համերգներ»,- նշեց Ա. Դավուդյանը:
Նրա հաշվարկով՝ Իրանից ՀՀ տեղափոխման հնարավորությունները 8-9 հազար մարդ է, մեքենաներն էլ հաշված՝ առավելագույնը 10 հազար: Անցած տարի թվեր էին հրապարակում 20 հազար պարսիկ զբոսաշրջիկների մասին, ինչն, ըստ ընկերության տնօրենի, չափազանց ուռճացված է, դա հեքիաթային թիվ է: Անցած տարի մարտին օդանավերով 4 հազար մարդ է տեղափոխվել, այսինքն՝ մնացածը՝ 16 հազարը ցամաքով է եկել, իսկ 40 տեղանոց մեքենաներով հաշվելիս ստացվում է 450 ավտոբուս, 10 օրում օրական 45 ավտոբուս: Ա. Դավուդյանը դա «աբսուրդ» անվանեց: Իսկ ՀՀ-ում զբոսաշրջիկը մոտ 1000 դոլար է ծախսում:
«Շուկան գներն ինքը կկարգավորվի, երբ այս տարի առաջին հարվածը ստանա: Բայց պետական մոտեցումը դժվարեցնում է՝ արտոնագրումներ, գրանցումներ և այլն: Հյուրանոցներն էլ գերադասում են իրանցիների հետ աշխատել, որ այլ թիվ ցույց տան, դրա համար էլ տեղի գործակալությունների հետ չեն աշխատում: «Ավիատրանսը», «Հրազդանը», «Ռոյալ փալասը», «Մարիոթը», «Կոնգրեսը» ահազանգում են: Նրանք խնդիրներ կունենան: Արդեն խնդիրների հոտը գալիս է»,- ասաց Ա. Դավուդյանը:
Լուսանկարը՝ Նազիկ Արմենակյանի
