Իռլանդիայի դատարանը 6 տարվա ազատազրկման է ենթարկել գործարար Փոլ Բեգլին` Չինաստանից ավելի քան հազար տոննա սխտոր անօրինական կերպով ներմուծելու համար:
Ինչպես հայտնի է դարձել դատավարության ժամանակ, 2003-2007թթ.-ներին Բեգլին, որի ընկերությունը բանջարեղեն և միրգ ներկրող ամենախոշորներից է Իռլանդիայում, երկիր է ներկրել հազար տոննա սխտոր` չվճարելով համապատասխան հարկերը, ինչի արդյունքում երկրին հասցված վնասը կազմել է 1,6 մլն եվրո: Այս մասին հաղորդում է BBC-ն:
Բեգլիի հանցանքի մասին հայտնի էր դարձել 2007թ.-ին, երբ հայտարարագրված 3 տոննա սխտորի և 18 տոննա խնձորի փոխարեն արկղերում հայտնաբերվել էր բացառապես սխտոր: Հետագայում Բեգլիի նամակագրությունից հայտնի էր դարձել, որ նա չինացի առաքիչներին խնդրել է սխտորը ներմուծել այլ ապրանքատեսակի անվան տակ:
Բեգլին իր այս քայլը բացատրել է նրանով, որ Իռլանդիայում սխտորի ներմուծման մաքսային տուրքերը շատ մեծ են, և դրանք երբեմն հասնում են 232%-ի:
Դատարանը նշել է՝ չնայած այն փաստին, որ Բեգլին համարվում է օրինակելի գործարար, որը մեծ ուշադրություն է հատկացնում իր աշխատակիցներին և ակտիվորեն մասնակցում է բարեգործական ակցիաներին, այդուհանդերձ՝ նրա հանցագործության արդյունքում մեծ վնաս է հասցվել պետությանը:
