Մարտի 10-ին տեղի է ունենալու Հանրապետական կուսակցության 13-րդ համագումարը: Առաջիկա համագումարի վերաբերյալ որոշակի տեղեկություններ ճշտելու համար «Առաջին լրատվական»-ը զրուցեց ՀՀԿ փոխնախագահ, ԱԺ ՀՀԿ խմբակցության ղեկավար Գալուստ Սահակյանի հետ:
– Պարոն Սահակյան, այս օրերին բոլորը խոսում են համամասնական ցուցակների մասին, թե ով որ տեղում է: ՀՀԿ-ն իր համագումարի ընթացքում բավարարելո՞ւ է հասարակության այդ հետաքրքրությունը, ցուցակներ հարապարակելո՞ւ եք:
– Ո՛չ, համագումարի ժամանակ համամասնական ցուցակի մասին որևէ քննարկում չի լինի: Ցուցակի շուրջ քննարկումները համագումարից հետո կլինեն՝ հաջորդ շաբաթ:
– Իսկ անակնկալների սպասե՞նք: Օրինակ` կան լուրեր, թե ՀՀԿ գործադիր մարմնում փոփոխություններ են լինելու, որոշ մարդիկ դուրս են գալու:
– Համագումարը հիմնականում ներկուսակցական որորշումներ է ընդունելու: Ինչ վերաբերում է գործադիր մարմնին, ապա դեռևս խնդիրը քննարկված չէ, կարծում եմ՝ գործադիր մարմինը վաղը կհավաքվի և իր նախնական առաջարկությունները կձևավորի:
– Համագումարի ընթացքում կուսակցության նախագահ ևս ընտրելու եք, այս անգամ ե՞ւս միակ թեկնածուն Սերժ Սարգսյանն է, թե՞ այլ թեկնածուներ էլ կան:
– Ո՛չ, միակ թեկնածուն Սերժ Սարգսյանն է:
– Այսինքն` ՀՀԿ համամասնական ցուցակի առաջին տեղում ևս նա է լինելու:
– Ցուցակի վերաբերյալ որևէ հարց դեռևս չի քննարկվել:
– Հասկանալի է, բայց մոտեցումն այս հարցում ինչպիսի՞ն է:
– Ես բազմիցս իմ մոտեցման մասին ասել եմ ու ևս մեկ անգամ կասեմ՝ իհարկե, յուրաքանչյուր կուսակցության առաջնորդ ինքը պետք է գլխավորի այդ կուսակցության համամասնական ցուցակը, որովհետև դա ընտրական ցուցակ է, և կուսակցական թիմը այդ կերպ պետք է հասարակությանը ներկայանալի դառնա:
– Պարոն Սահակյան, հաշվի առնելով այն հանգամանքը, որ սա ընտրություններից առաջ տեղի ունեցող համագումար է, ծրագրային նոր ուղենիշերի, նոր մոտեցումների մասին բարձրաձայնվելո՞ւ է:
– Կուսակցության նախագահի հաշվետու ելույթում բնականաբար որոշակի քաղաքական վերլուծություններ կլինեն, կարծում եմ, որ համագումարը նաև բանաձև կընդունի:
– Համամասնական ցուցակում գործարարներ լինել-չլինելու մասին շատ է խոսվել, այդ հարցը վերջնականապես որոշվա՞ծ է:
– ՀՀԿ ցուցակում կլինեն մարդիկ, որոնք միայն ու միայն զբաղվելու են քաղաքականությամբ, պատգամավորական գործունեությամբ: Այդ սկզբունքն արդեն որոշակի է, թե մենք ենք այդ մասին արդեն օրեր շարունակ ասում, նաև այդ մասին խոսել է հանրապետության նախագահը:
– Իսկ մեծամասնական առաջադրումների դեպքում ե՞ւս այս սկզբունքը գործելու է:
– Սովորաբար կուսակցությունը որոշում է ընդունում իր թիմի վերաբերյալ, իսկ մեծամասնականի դեպքում յուրաքանչյուր անձ ինքն է որոշում՝ առաջադրվել, թե ոչ:
– Նկատի ունենք այն թեկնածուներին, որոնք ՀՀԿ-ից են:
– Նրանք նաև ՀՀ քաղաքացիներ են և ինքնուրույն կարող են որոշել իրենց անելիքը:
– ՀՀԿ համագումարում հայաստանյան քաղաքական դաշտի բոլո՞ր ուժերն են հրավիրված:
– Բազմաթիվ կուսակցությունների, հասարակական կազմակերպությունների հրավերքներ ուղարկվել են: Հրավիրել ենք նաև «Եդինայա Ռոսիա» և Եվրոպայի ժողովրդական կուսակցություններին:
– Նախընտրական ծրագրի վերաբերյալ քննարկումներ համագումարում լինելո՞ւ են, և ո՞վ է հիմնականում զբաղվում ՀՀԿ նախընտրական ծրագրի մշակմամբ:
– Նախընտրական ծրագրի մշակմամբ զբաղվում է կուսակցության շտաբը, այնտեղ կա աշխատանքային խումբ, որը քննարկում է ծրագրի խնդիրները, և ինչպես արդեն նկատել եք, նախընտրական ծրագրի մշակմամբ զբաղվում է ՀՀԿ գործադիր մարմնի անդամ վարչապետ Տիգրան Սարգսյանը, որը այցելում է մարզեր և փորձում է մեր ծրագրի մշակմանը մասնակից դարձնել նաև ժողովրդին: Իսկ ամփոփ ծրագիրը վերջնական կքննարկվի գործադիր մարմնի նիստում ու դրանից հետո նոր կհրապարակվի: Համագումարի ընթացքում ծրագրային խնդիրներ կբարձրացվեն, վերլուծություններ կլինեն, բայց ծրագիրն ամբողջությամբ մի փոքր ուշ կլինի:
– Վերջերս ՄԻԱԿ-ն իր համագումարի ժամանակ հայտարարեց, որ սատարում է ՀՀԿ-ին ու տեղ է գտնելու ՀՀԿ համամասնական ցուցակում: Արդյոք ՀՀԿ-ն իր համագումարի ժամանակ պատասխանելո՞ւ է ՄԻԱԿ-ին և մյուս այլ ուժերին, որոնք ցանկություն կհայտնեն հայտնվելու ձեր համամասնական ցուցակում:
– Դա հարց է, որը կապված է համամասնական ցուցակի հետ, ինչի վերաբերյալ քննարկումներ դեռևս չեն եղել, քննարկումները կլինեն հաջորդ շաբաթվա ընթացքում, ու այդ ժամանակ էլ որոշում կկայացնենք: