Ինչպես երևում է, ՀՀ բնապահպանության նախարարությունը ընդունակ չէ պայքարել Սևանում ապօրինի ձկնորսության դեմ: Չնայած նախարարության հայտարարությանը, համաձայն որի՝ 2010 թվականի դեկտեմբերի 8-ից մինչև 2011 թվականի հունվարի 20-ը Սևանա լճում սիգ ձկնատեսակի որսը պետք է արգելվեր, հայկական ամանորյա բազամաթիվ սեղաններ այս տարի ևս համեմվեցին Սևանի սիգով: Եվ ոչ միայն ամանորյա սեղանները, նույնիսկ հունվարի 9-ի դրությամբ սիգը միանգամայն բացահայտ կերպով վաճառվում էր մայրաքաղաքում, օրինակ՝ Նոր Նորքի առաջին զանգվածում, ընդ որում՝ արկղերով վաճառվում էին մանր ձկներ: Տոպրակով իր գնած 2 կգ մանր ձկները հպարտությամբ տանող մի կին նույնիսկ պատմեց սիգի ապօրինի վաճառքի նախապատմությունը. Սևանի ճանապարհին մի հատվածում ձեռքով ձկան նշան ցույց տվող մարդ է միայն երևում, մինչդեռ մոտերքում գետնի տակ փոս է փորված, ու երբ մոտենում, ձուկ գնել ես ցանկանում, մտնում են գետնափորն ու բերում որսած, իրենց մոտ պատրաստի պահած թարմ ձկները։ Եթե հանկարծ ոստիկանությունը գա, ճամփեզրին ոչինչ չկա, որ տեսնեն:
Հետաքրքիրն այն է, որ սիգի պոպուլյացիայի պահպանումը համարվում է բնապահպանության նախարարության առաջնային խնդիրներից մեկը: