Մասաչուսեթսի նախկին նահանգապետ Միթ Ռոմնին հաղթել է Օհայո և Այդահո նահանգների նախնական ընտրություներում, ընդ որում՝ Օհայոյի հաղթանակն առանցքային նշանակություն ունի. դեռևս ոչ մի հանրապետական թեկնածուի չի հաջողվել դառնալ ԱՄՆ ղեկավար՝ չհավաքելով ձայների մեծամասնությունն այդ նահանգում:
«Ռոմնին հաղթող է ճանաչվել Այդահոյում՝ հավաքելով ձայների 75%-ը: Երկրորդը Փոլն է՝ ձայների 12%-ով, երրորդը Սանտորումը՝ 9%-ով, ցուցակը եզրափակում է Գինգրիչը՝ 3%-ով»,- հայտնում է CNN-ը՝ նախկին նահանգապետին պաշտոնապես հայտարարելով հաղթող:
ԱՄՆ միանգամից 10 նահանգների ընտրողները մարտի 6-ին որոշում էին, թե հանրապետական թեկնածուներից ում կցանկանային տեսնել գոծող նախագահ դեմոկրատ Բարաք Օբամայի մրցակից: Ընտրությունները տեղի են ունեցել Ջորջիա, Այդահո, Մասաչուսեթս, Հյուսիսային Դակոտա, Օհայո, Օկլահոմա, Թեննեսի, Վիրջինիա, Վերմոնտ և Ալյասկա նահանգներում:
Սակայն ԶԼՄ-ների և փորձագետների հիմնական ուշադրությունը կենտրոնացած էր Օհայոյի վրա, քանի որ ԱՄՆ հանրապետական բոլոր նախագահները հաղթել են այստեղի պրայմերիզներում:
Օհայոյում Ռոմնին ընդամենը 1%-ով շրջանցել է Սանտորումին՝ հավաքելով ձայների 38%-ը: Գինգրիչն այս նահանգում հավաքել է ձայների 15%-ը, Փոլը՝ 9%-ը: