Human Rights Watch միջազգային իրավապաշտպան կազմակերպությունը կոչ է արել Վլադիմիր Պուտինին, ով հաղթել է ՌԴ նախագահական ընտրություններում, բարեփոխումներ իրականացնել և դադարեցնել օրենքի խախտումները:
Կազմակերպության հաղորդագրության մեջ նշվում է. «Ռուսաստանի կառավարությունը ճիշտ է արել, որ չի խանգարել զանգվածային ցույցերին և որոշակի բարեփոխումներ է իրականացրել»:
Իրավապաշտպանները նշում են, որ «ընտրված ռուս նախագահը հիանալի կերպով կարող է ցուցադրել, որ իրոք հետևում է օրենքին, եթե 100 օրվա ընթացքում հստակ քայլեր անի բարեփոխումներ իրականացնելու ուղղությամբ»:
Մասնավորապես, Human Rights Watch-ը կոչ է արել Պուտինին թույլ տալ շարունակել խաղաղ ցույցերը, դադարեցնել բռնություններն ընդդիմության ներկայացուցիչների և լրագրողների հանդեպ, քաղաքական միջամտություն չցուցաբերել դատական համակարգի գործերին, հեշտացնել քաղաքական կուսակցությունների գրանցումը:
Հիշեցնենք, որ ՌԴ նախագահական ընտրությունները կայացել են մարտի 4-ին: Պաշտոնական տվյալների համաձայն՝ Վլադիմիր Պուտինը հավաքել է ձայների 63.60 տոկոսը: ՌԴ նախագահն առաջին անգամ ընտրվում է վեց տարի ժամկետով: Պուտինն իր պարտականությունների կատարմանը կանցնի մայիսի 7-ից:
Ռուսական ընդդիմությունը հայտարարել է կոպիտ խախտումների մասին:
