Իտալիայի իշխանությունները 2011 թ. հայտնաբերել են ավելի քան 1 մլն անօրինական շինություն,- գրում է La Repubblica-ն՝ վկայակոչելով երկրի ազգային կադաստրային գործակալությանը: Անօրինական շինությունները գտնելու համար պաշտոնյաները արբանյակից երևացող շինությունները համեմատել են պաշտոնական փաստաթղթերի տվյալների հետ:
Թերթը գրում է, որ ըստ երկրի ֆինանսների նախարարության հաշվարկների՝ անշարժ գույքը թաքցնելու հետևանքով պետությանը հասցվել է 472 մլն եվրոյի վնաս:
Անօրինական շինությունների մեծ մասը գտնվում է երկրի հարավում՝ Նեապոլի, Կոզենցայի, Սալերնոյի և Ռեջո դի Կալաբրիայի շրջաններում:
Անօրինական շինությունների սեփականատերերի դեմ գործողությունները սկսվել են Մարիո Մոնտիի կառավարության ծրագրով, որն ակտիվ պայքար է սկսել հարկերից խուսափողների դեմ:
Իշխանությունների տվյալներով՝ պետությունը դրա պատճառով տարեկան կորցնում է մինչև 150 մլրդ եվրո այն դեպքում, երբ երկրի պետական պարտքն արդեն հասել է 1.9 տրլն եվրոյի:
