РБК-ի փոխանցմամբ՝ ԱԷՄԳ-ի գլխավոր տնօրեն Յուկիա Ամանոն, Վիեննայում ելույթ ունենալով ԱԷՄԳ-ի գործադիր խորհրդի 35 անդամ երկրների ներկայացուցիչների առջև, անհանգստություն է հայտնել Թեհրանի մոտ ընկած «Փարչին» ռազմական հրաձգարանում ակտիվ գործունեության նշանների ի հայտ գալու կապակցությամբ:
Ամանոն կարևորել է հնարավորինս շուտ այնտեղ ԱԷՄԳ-ի փորձագետների գործուղումը. «Մենք հետևում ենք «Փարչինում» ակտիվ գործունեության նախանշաններին, ինչը չափազանց մտահոգում է մեզ և ստիպում է կարծել, որ անհրաժեշտ է հնարավորինս շուտ մեկնել այնտեղ:
ԱԷՄԳ-ում չեն վերացել Իրանի միջուկային ծրագրի ռազմական ուղղվածության հետ կապված մտահոգությունները: Թեհրանին չհաջողվեց այդ կապակցությամբ ներկայացնել հուսալի երաշխիքներ, որ իրանցի ատոմագետները չեն իրականացնում միջուկային մշակումներ, որոնց մասին ԱԷՄԳ-ը տեղյակ չէ»:
Թեև Ամանոն չի հստակեցրել «Փարչինում» ակտիվ գործունեության նշանների մանրամասները, սակայն փորձագետները կարծում են, որ իրանցիները փորձում են այդ բազան մաքրել ամեն տիպի վարկաբեկող և վնասակար բաներից՝ նախքան ԱԷՄԳ-ի փորձագետների կողմից այդ օբյեկտ այցելելը:
Հիշեցնենք, որ Իրանն արդեն իսկ համաձայնել է թույլ տալ ԱԷՄԳ-ի ներկայացուցիչներին այցելելու «Փարչին», սակայն իրանական կողմն ընդգծել է, որ դա պահանջում է տևական ժամանակ, քանի որ այն ռազմական օբյեկտ է:
Ի դեպ, փետրվարի 24-ին Իրանի միջուկային ծրագրի վերաբերյալ ԱԷՄԳ-ի հրապարակած զեկույցում նշված էր, որ վերջին 4 ամիսներին Իրանն արագացրել է բարձր աստիճանի ուրանի հարստացման աշխատանքները, ինչը մեծացնում է նրա միջուկային ծրագրի ռազմական ուղղվածության վերաբերյալ կասկածները:
