Թեպետ «Ժառանգություն» կուսակցությունը դեռևս չի որոշել՝ ո՞ր հեռուստաալիքներով է քաղաքական գովազդներ պատվիրելու, սակայն հավանական է, որ օգտվի անխտիր բոլոր ալիքներով նախընտրական շրջանում հանդես գալու հանարավորությունից: «Առաջին լրատվական»-ի հետ զրույցում այս մասին ասաց կուսակցության պատգամավոր Արմեն Մարտիրոսյանը՝ հիշեցնելով, որ նախորդ ընտրությունների ժամանակ ևս՝ անկախ քաղաքական գովազդի համար սահմանված սակագներից՝ իրենք գովազդ պատվիրել են բոլոր ալիքներում:
«Կարծում եմ՝ «Շանթ»-ի՝ մեկ րոպեի համար սահմանած 120 հազար դրամ սակագինը շատ բարձր է: Բայց կուսակցությունները, ցանկանան, թե ոչ, ստիպված են լինելու օգտվել երևի թե բոլոր հեռուստաընկերություններից, քանի որ դրանք տարբեր լսարաններ ունեն»,- ասաց նա: Հարցին՝ «Ժառանգությունը» և՞ս ստիպված է լինելու՝ Արմեն Մարտիրոսյանն ասաց, որ չի կարծում՝ այս թեմայի շուրջ խոսելու ճիշտ ժամանակն է: «Ամեն բան կորոշվի քարոզարշավի ժամանակ, բայց ամենայն հավանականությամբ կօգտվենք բոլոր հեռուստաընկերությունների եթերներից»:
Նշենք, որ Հանրային ու մասնավոր հեռուստաընկերություններն արդեն սահմանել են մայիսի 6-ին կայանալիք խորհրդարանական ընտրությունների քարոզարշավի ընթացքում քաղաքական գովազդի սակագները: Ապրիլի 8-ից մեկնարկող քարոզարշավի ընթացքում ամենաթանկ գինը սահմանել է «Շանթ» հեռուստաընկերությունը. քաղաքական գովազդի 1 րոպեն այս հեռուստաընկերությունում արժե 120 հազար դրամ:
Երկրորդ տեղում «Արմենիա» հեռուստաընկերությունն է. քաղաքական գովազդի 1 րոպեն այս հեռուստաընկերությունում արժե 110 հազար դրամ:
Երրորդ տեղում Հանրային հեռուստաընկերությունն է. այստեղ քաղաքական գովազդի 1 րոպեն կարժենա 80 հազար դրամ:
