Եմենի ռազմական պաշտոնյաներն ասում են, որ երկրի հարավային Աբյան շրջանում սկսված կռիվների հետևանքով բանակի 8 զինվոր և «Ալ-Կաիդա»–ի 14 գրոհային է մահացել:
Ըստ Associated Press-ի՝ պաշտոնյաներից մեկն այսօր ասել է, որ կռիվները տեղի էին ունենում Աբյանի շրջանային մայրաքաղաք Զինջիբարում:
Պաշտոնյաները խոսել են առանց իրենց անունները հաղորդելու, քանի որ լրատվամիջոցներին տեղեկություններ հայտնելու իրավունք չեն ունեցել:
Աբյան շրջանի բռնությունները մեկ անգամ ևս վկայում են այն մարտահրավերների մասին, որոնք Եմենը պետք է հաղթահարի մեկ տարի տևած քաղաքական անհանգստություններից հետո, որոնց հետևանքով «Ալ-Կաիդա»–ին հաջողվեց գրավել երկրի հարավում գտնվող մի քանի քաղաքներ:
