Օրերս «Առաջին լրատվական»-ում տպագրված «Արա Թեմո, դու գիտե՞ս ես ով եմ, տեղը չես բերում» հրապարակմանն արձագանքել է Հայաստանի ըմբշամարտի բազմակի չեմպիոն Տիգրան Կեսոյանի (գերծանր` 120 կգ քաշային կարգ) հայրը` Սամվել Կեսոյանը: Նա, չթաքցնելով իր հիասթափությունը, ասաց, որ այն, ինչ գրվել է իր որդու մասին (լրագրողն օգտվել է դատաքննական նյութերից), մասամբ չի համապատասխանում իրականությանը, և որ իր երեխայի գլխին իրավապահները «սարքել են»` դարձրել են հանցագործ միայն նրա համար, որ նա «տղավարի» պահվածք է ունեցել. չի բողոքել, ցուցմունք չի տվել իրեն դանակահարողների դեմ, ու քանի որ իրենք չեն հետևել գործի ընթացքին, դանակահարողներին դարձրել են տուժող, իր որդուն` հանցագործ: Եվ այդ ամենից հիասթափված` Տիգրան Կեսոյանն արդեն մեկնել է Նովոռոսիյսկ և այսուհետ Ռուսաստանի դրոշի տակ է ըմբշամարտի մրցասպարեզ դուրս գալու: «Չգիտեմ, էդ երեխեն երևի էլ չվերադառնա: Երեխուս ես կորցրի, ես կորցրի իմ երեխուն էս դատա-իրավական համակարգի ձեռքը: Ես ապշած եմ մնացել: Իմ երեխու գլխին ինչո՞ւ այսպիսի բան սարքեցին, ո՞ւմ էր սա պետք»,- մեզ հետ զրույցում իր վրդովմունքը հայտնեց Հայաստանի չեմպիոնի հայրը, որի որդին այդ դանակահարության արդյունքում անցյալ տարի զրկվել էր Հայաստանի մրցումներին մասնակցելուց, Հայաստանի դրոշի տակ Եվրոպական մրցասպարեզ դուրս գալուց:
Հիշեցնենք, որ հոդվածը վերաբերում էր Երևանի «Ուրարտու» ռեստորանում կատարված դեպքին. Տիգրան Կեսոյանը իր ընկերոջ հետ եկել էր վերջինիս ընկերուհու` Անժելա Հովհաննիսյանի ծննդյան տարեդարձը նշելու: Ըստ մեղադրական եզրակացության` Տիգրան Կեսոյանը, գտնվելով ալկոհոլի ազդեցության տակ, անհասցե հայհոյանքներ է տվել իր սեղանակիցների ներկայությամբ, որի համար դիտողություն ստանալով Անժելայի ընկերուհի` Թեհմինե Մելքոնյանից, անհիմն վիճաբանության մեջ է մտել նրա հետ` ասելով «արա, դու գիտես ես ով եմ, տեղը չես բերում»: Նկատելով, որ սեղանակից Մացակ Պողոսյանը նայել է իրեն, վերջինիս դուրս է հրավիրել, որից հետո պարահրապարակում «կոպիտ կերպով խախտել է հասարակական կարգը»:
Արդյունքում Կենտրոն և Նորք-Մարաշ վարչական շրջանների ընդհանուր իրավասության դատարանը Տիգրան Կեսոյանին դատապարտել է 2 տարվա ազատազրկման և համաներմամբ նրան ազատել պատժի կրումից: Մինչդեռ Տիգրան Կեսոյանի հայրը` Սամվել Կեսոյանը, դեպքը այլ կերպ է նկարագրում. «Ինքը հայհոյանք չի տվել, ուղղակի իր ընկերոջ հետ բարձր խոսել է, քանի որ երաժշտությունն էլ է բարձր եղել: Իմ տղան ու Լևոնը խնջույքը սկսելուց շատ ուշ` երկու ժամ հետո են եկել: Իրենք որ եկել են, այդ սեղանի վրա արդեն ահագին դատարկված շշեր են (խմիչքի) եղել, այսինքն` արդեն քյալլեքը տաքացած է եղել:
Դե իրենք նստել են, տեսել են էս վիճակն է, ասել են` լավ մի տասը րոպե նստենք` դուրս գանք: Ու Տիգրանը մի քիչ բարձր ա խոսել: Այդ Թեմո կոչեցյալը, դիտողություն ա արել… Լևոնը ասել ա` ի՞նչ ես դիտողություն անում…»: Այդպես քաշքշուկ է առաջացել. «…Այդ պահին վեր է կենում Արամ Պողոսյանը, գալիս ա` Տիգրանի օձիքից քաշում. բա` հըլը մի հատ հել… Տիգրանը` հզոր տղա իր տիտղոսով, Թուրքիայում թուրք ծեծող տղա ա եղել, հայկական դրոշ ա բարձրացրել:
Արամը գնացել կանգնել է մեջտեղը` ասել` արա, հըլը արի»,- պատմում է Սամվել Կեսոյանը: Սակայն Տիգրանը չի հասցրել ոչ մի բան հասկացնել գինովցած երիտասարդին: «Իրար հետ քայլելով դուրս գալուց են եղել, հետևից մի հատ շամպայնի շիշ ջարդում ա Տիգրանի գլխին: Այ սենց գեմատոմա էր գլխի վրա (որից հետո, հոր հավաստմամբ` թուլացել է Տիգրանի կոորդինացիան): Ու այդպես իրար քաշքշում են. Տիգրանին, դանակահարում են, ու նա արդեն խփված` կողքը բռնած աֆիցիանտի օգնությամբ դուրս է գալիս ռեստորանից…»,- պատմում է Տիգրանի հայրը, որն այդպես էլ չի կարողացել որդուն համոզել` մնալ Հայաստանում:
«Ընդամենը գործին չհետևեցի: Լրիվ երեխու վրա սարքեցին, երեխեն այսօր ցայտնոտի մեջ է: Տարել եմ բժշկի մոտ. էս գլխի խփածով ասեցին` իրա մոտ կոորդինացումը մի քիչ վատացել ա, որովհետև ուժեղ ա եղել հարվածը գլխին: Երեխեն երկու ամիս վեր էր թռնում անկողնուց` ընկնում, տարել եմ հոգեբույժի մոտ:
Ու էդքանից հետո դատախազը պահանջի 2 տարի ու համաներում կիրառելով ազատե՞ն: Որովհետև կապ կար` սրանք էլ են քյավառցի, նրանք էլ են քյավառցի: Արմենը` կենտրոնի դատախազի տեղակալը, սրանց քավորն ա, ու էս երեխային դարձրին հանցագործ: Թողեց` գնաց: Ասեց, պապա, եթե ես էս քաղաքում ապրեմ, ես չեմ կարա` իմ աչքին էդ տղաներն են երևում… ինչի՞ սենց բան եղավ իմ լավության դեմ…»:
