«Գրողի առջև ծառացած խնդիրները երբևէ չեն փոխվում։ Նա ունի մարդկանց՝ բարին, արդարը, մարդկայինը, հետաքրքիրը, առեղծվածայինը ճիշտ ներկայացնելու խնդիրը։ Առաջին գրողը, ով վերցրել է ու գրել, և այն երիտասարդը, ով հենց այս պահին իր առաջին տողերն է գրում, շատ բանով չեն տարբերվում»,- «Առաջին լրատվական»-ի հետ զրույցում ասաց դրամատուրգ Կարինե Խոդիկյանը։ Ըստ նրա՝ գրողի համար ամենակարևորը ազնիվ լինելն է սեփական գրքի առջև։
Խոսելով այսօրվա հայ գրողի թեմատիկայի մասին՝ Խոդիկյանը նշեց, որ աշխարհը բազմաթեմա է և բազմաբովանդակ։ Ամեն մարդ այդ բազմանվագ սիմֆոնիայում գտնում է իր հիմնական նվագը. «Ծիծաղելի կլինի, եթե գրողը գրի ամեն ինչի մասին։ Նա գրում է այն ամենի մասին, ինչը իրեն հոգեհարազատ է։ Պարզապես հաճախ դեպքերը ստիպում են գրողին թողնել իր նախընտրած ասելիքը և անդրադառնալ այդ պահին, իր կարծիքով, իր համար կարևոր թեմային»։
Վերջում Կարինե Խոդիկյանը մեր գրողներին մաղթեց այն, ինչ կցանկանար, որ իրեն մաղթեին. «Լինեն նպաստավոր պայմաններ, որ գրողը կարողանա գրել»։
