Այսօր Իտալիայի Գրոսետո քաղաքի թատրոնում սկսվում են հունվարին Իտալիայի ափերին խորտակված Costa Concordia նավի գործով առաջին լսումները, որտեղ գլխավոր կասկածյալը նավապետ Ֆրանչեսկո Սկետինոն է: Ինչպես հաղորդում է RIA Novosti-ն, թատրոնը ժամանակավորապես վերածվել է դատարանի դահլիճի, որտեղ կարող են տեղավորվել հարյուրավոր մարդիկ:
Նավապետը մեղադրվում է անփութության մեջ, որը հանգեցրել է մարդկանց մահվան և վտանգի տակ դրել հազարավոր ուղևորների կյանքը: Աղետից անմիջապես հետո կապիտանը գտնվում է տնային կալանքի տակ: Բացի նավապետից՝ նավաբեկության մեջ մեղադրվում են ևս 8 մարդ, այդ թվում կապիտանի օգնական Չիրո Ամբրոզին, ինչպես նաև նավի անձնակազմի 4 սպա և 3 բարձրաստիճան աշխատակից:
Այսօր սկսված լսումները նպատակ ունեն գնահատել մեղադրյալների մեղքի աստիճանը: Նիստի ընթացքում, որին ներկա կլինեն նավի ուղևորները, փորձագետներ, խորհրդականներ և փաստաբաններ, կպարզվի նավաբեկության կոնկրետ ժամը: Դա թույլ կտա հասկանալ, թե որքան ժամանակ է պահանջվել կապիտանից իրավիճակը գնահատելու համար, երբ է ահազանգ տրվել և սկսվել մարդկանց տարհանումը:
Հիշեցնենք, որ Costa Crociere ընկերությանը պատկանող Costa Concordia նավը խորտակվել է հունվարի 14-ին Տիրենեյան ծովում՝ Ջիլիո կղզու մոտ: Նավի վրա եղել է ավելի քան 4200 մարդ: Աղետի հետևանքով զոհվել է 25 մարդ, 7 մարդ մինչ այժմ համարվում է անհետ կորած:
